AS DIE ROOI LIGTE FLITS

Ideaal gesproke moet alle kinders voor vyf jaar oud een keer by ’n arbeidsterapeut uitkom.

Hoewel alle peuters by arbeidsterapie kan baat vind, is dit ongelukkig nie altyd haalbaar dat almal ’n terapeut te sien kry nie – soms is daar nie terapeute naby jou nie of kan julle dit nie bekostig nie. Moet egter nie die besoek uitstel nie as: • Jou baba onder ’n jaar nog sukkel met groot motoriese mylpale soos omrol, sit en kruip. Dit alles is belangrik vir die ontwikkeling van spiertonus in die nek en arms. Dit kan baie help om jou baba wat teen 10 maande nog nie kruip nie na ’n arbeidsterapeut te neem. Sy sal hom evalueer en dalk oefeninge voorskryf. • Jou peutertjie geneig is om aan tafel op haar arms te lê. Dit kan ’n simptoom van lae spiertonus wees. Ander tekens van lae tonus is as kleintjies baie lomp voorkom en gereeld val. As hulle baie hard op hul kryte druk het hulle dalk ook lae tonus. Hul lyfie voel nie stabiel nie en hulle gebruik die kryt as ’n soort stut. As dit nie reggestel word nie, kan jou kind se fyn motoriese vaardighede later ingeperk word. Lae spiertonus veroorsaak ook soms dat peuters in hul stoele wieg om hul tonus te probeer reguleer. Kinders wie se gewrigte verder kan buig as meeste ander kinders s’n, is soms ook geneig tot lae tonus. • Jou peuter tussen een en vier nie soos ander peutertjies hou van eksperimenteer met groot speelapparate (soos glyplanke en klimrame) en speelgoed nie. As sy altyd wegdeins van vreemde teksture en smake of besonder oorsensitief voorkom vir klanke, reuke of visuele insette, sukkel sy moontlik met sensoriese integrasie – iets waarmee arbeidsterapeute baie kan help. Ander tekens om voor uit te kyk is ’n peuter wat nie hou van kaalvoet loop nie. • Sy nie daarvan hou om dinge uit te pak en om te krap en dan weer op te bou nie. Hierdie sogenaamde oorgang van destruktief na kreatief is ’n belangrike ontwikkelingsmylpaal. • Jou peutertjie besonder apaties is en haar meestal van ander kinders isoleer. Peuters wat duidelik nie van vertroeteling hou nie kan ook baat vind by arbeidsterapie. Sommige peuters reageer op ’n ander manier in groepe deur ander altyd te stamp en stoot. Ook hiér kan ’n arbeidsterapeut help met ’n evaluasie. • Jou drie- of vierjarige blykbaar nie in staat is om lank stil te sit nie of regtig sukkel om opdragte uit te voer en speletjies te verstaan. Hoewel ontwikkelingsmypale soos dié eers vanaf vier- tot sesjarige ouderdom belangrik word, kan jy tog in die peuterjare al vroeë tekens van ‘n probleem raaksien.