WAT JY MOET PAK

NIE TE VEEL NIE! Jy kan altyd ’n paar goedjies uitspoel terwyl jy met vakansie is. Maar moet ook nou nie so min pak dat jy elke tweede dag moet klere was nie. Pak lekker ligte klere in, met twee warmer uitrustings vir koel aande of wanneer dit reën. Twee pare skoene vir elk – soos tekkies en plakkies – is heeltemal voldoende. Neem ekstra HANDDOEKE, ’n KOMBERS of twee en gunstelingKUSSINGS saam as julle plek het. Veral klein kindertjies voel veilig wanneer hulle hul eie kombersies op vreemde plekke het. Kry vir jou ’n goeie NOODHULPTASSIE met al die noodsaaklikhede vir ’n noodgeval: verbande, ontsmetmiddel, middels vir brandwonde en so meer. Pak ook medikasie soos anti-diarreemiddel, ’n pyn- en koorsstroop, oor- en oogdruppels en enige chroniese medikasie in. Neem ook insekweerders, ’n strelende salfie vir byte en antihistamiene saam. Insekte is meer aktief in die warm weer. Kyk of julle voor die vakansie almal by die TANDARTS kan uitkom. Niks bederf ’n vakansie soos ’n kind wat tandpyn kry op ’n vreemde plek nie. SONBRANDMIDDEL is ’n moet, so ook room wat jy op sagte velletjies kan smeer indien die son hulle dalk piets. Moet ook nie hoede vergeet nie! Sorg dat jou kind ’n beskermende baaikostuum het, asook ’n goeie swemgordel wanneer julle gaan swem. Onthou dat baie dinge dikwels duurder op vakansiedorpe is, veral op klein plekkies. As jy kan, pak dus genoeg WEGGOOIDOEKE, FORMULEMELK en NIE-BEDERFBARE KOS in. As julle nie te ver reis nie, kan jy selfs bevrore produkte soos vleis in ’n koelsak saamneem. ’n VEILIGHEIDSHARNAS is nuttig as jy weet jou kind is geneig om weg te dwaal. Verder is ’n swem-drasak baie gerieflik – jy sit jou kind in die drasak terwyl jy swem en jy weet sy is altyd veilig. Dit maak dit ook makliker vir kinders wat bang is vir water. PAK DIE KERSGESKENKE SKELM IN WANNEER DIE KINDERS GAAN SLAAP HET.