SUPERKOEL SOMERMAMMA
KOEL, EKSOTIESE DRANKIES
Swangerskap laat ’n mens meer sweet, en swangerskap in die somer laat mens nóg meer sweet. Dit is dus noodsaaklik om genoeg vloeistowwe in te neem. Ontwatering is niemand se speelmaat nie, en ook nie goed vir jou baba nie. Tekens dat jy ontwater sluit in ’n groot dors, droë lippe en vel, moegheid en hardlywigheid. As jou urine nie ’n baie ligte geel is nie, drink jy ook nie genoeg nie.
Meng gerus vir jou ’n nie-alkoholiese mengeldrankie. Versap ’n glas lemoensap, ’n stuk komkommer en ’n paar kruisementblare saam. Giet dit oor ysblokkies en geniet.
’n Mengsel van natuurlike jogurt, yswater en vrugtesap van jou keuse (1:1:1) is ook baie verfrissend.
As jy moeg is vir water, maak ystee met rooibos, suurlemoensap en heuning.
Maak ysblokkies waarin kruisementblare opgekap is en voeg dit by jou water of sap.
JOU EIE MOBIELE VERKOELER SAAM
Maak ’n sproeibotteltjie vol koel water gemeng met rooswater of laventel en spuit veral jou gesig en voete met die fyn missproei as jy warm kry. Dit sal jou ontspanne en verfris laat voel en boonop lekker laat ruik. Jy kan die botteltjie oral met jou saamdra.
’n Minder gesofistikeerde weergawe is ’n koel, klam waslap wat oornag in die vrieskas was, wat jy agter teen jou nek of teen jou voorkop kan hou as die hitte jou onderkry. Dit help om jou liggaamstemperatuur effens te verlaag.
Oorverhitting is ’n wesenlike gevaar as jy swanger is. Tekens van hitte-uitputting sluit in moegheid, swakheid, naarheid, spierkrampe en dat jy wil flou word of duiselig voel.
EN KAAL, LIG EN LOS
Die laaste ding wat jy nou nodig het, is klouende klere wat oor jou bultende boep span en jou nóg groter laat voel. As jy ’n mooi magie het, kan jy gerus uithaal en wys. So nie is die sleutel gemaklike style in natuurlike stowwe soos katoen, linne en sy. Natuurlike stowwe laat lug deur, help jou om koel te bly en keer ook dat jy nie te veel sweet en so dalk ’n hitte-uitslag op ongemaklike plekke soos onder jou bors of tussen jou bobene opdoen nie – iets wat algemeen tydens swangerskap voorkom.
Veral onderklere kan ’n verskil aan jou gemak maak. As jou bra’s en broekies al knyp, belê gerus in spesiale kraam-onderklere soos dié van Carriwell – jy sal nie spyt wees nie.
Rokke is ook gemakliker as klere in twee stukke, want met ’n rok druk niks jou in jou middel nie.
IN DIE WATER
Swem sal jou nie net koel hou nie, dis ook die perfekte someroefening vir jou en jou magie en sal keer dat jy dalk oorverhit terwyl jy probeer fiks bly vir die kraamslag. Dit haal ook die gewig van jou bene af.
Oorweeg ook water-aërobiese klasse vir swanger vroue.
As jy nie toegang tot ’n swembad het nie, oefen op die koel tye van die dag soos soggens vroeg of smiddae baie laat, en koel agterna in die stort af.
Chloor kan jou vel en hare baie uitdroog. Vryf opknapper in jou hare voor jy swem en skaf ’n vars lyfroom aan om agterna te smeer.
’N KOEL OASE IN JOU HUIS
Skep een kamer in die huis wat ultrakoel is. Kies ’n kamer wat suid kyk, want dit sal die minste son kry. Hou die gordyne heeldag toe sodat die hitte buite bly en versier die vertrek met koel kleure soos wit, lemmetjiegroen, blou, pienk en groen. Hou die lugverkoeling heeltyd op sy koudste verstelling of sit ’n waaier neer met ’n bak water daarvoor. Jy kan ook roosblare of jasmyn in die water sit om jou te help ontspan. Trek ’n lekker los kaftan aan, sit komkommerskyfies uit die yskas op jou oë en jy voel sommer gou soos ’n lentebries!
JOU VOETE
As jou voete warm kry, sal jy ook warm kry! Swangerskap is nie die tyd vir hoë hakke en toe skoene nie – daar is gelukkig baie byderwetse plathak-somersandale beskikbaar sodat jy steeds elegant kan lyk. Bederf jou met ’n pedikuur by jou naaste spa.
Belê ook in ’n voetspa, of vul ’n klein skotteltjie met koel water met ’n bietjie sout daarin. Sit albasters onderin en vryf jou voete daaroor vir ’n lekker voetmassering.
Hoewel die meeste swanger vroue se voete en enkels in die laaste trimester weens ’n toename in bloedvolume matig swel, sal die somerhitte dié toestand vererger omdat die liggaam dan nog meer vloeistof terughou. Een van die beste teenvoeters is om gereeld met jou voete omhoog te sit. As jou voete of ander dele van jou lyf steeds baie geswel bly, bespreek dit met jou ginekoloog. Dit kan ’n teken wees van preëklampsie, wat baie gevaarlik kan wees.
Help limfdreinering aan deur jou lyf elke oggend met ’n droë borsel te borsel voor jy in die stort klim. Begin by jou voete en borsel altyd in die rigting van jou hart.
As dit baie warm is, onthou om soggens jou ringe af te haal sodat dit nie later in die dag vassit nie. As jou hande kaal voel sonder ringe, kan jy jou naels ’n helder kleur verf om daarvoor te vergoed.
AF MET KRUISEMENT
Kruisementgegeurde produkte skep die illusie van ’n koel briesie. Suig aan pepermente, drink ystee met kruisementblare en kies lyfprodukte met ’n kruisementgeur. Sit ’n bak water met ’n druppel kruisementolie in voor ’n waaier neer om ’n vertrek af te koel.
KOUE KOS, SKAT
Eet gereeld klein maaltye sodat jy nooit oorvol voel nie. Prop jou somerspyskaart vol vrugte, bessies, slaai en groente. Koue maaltye wat steeds voedsaam en vullend is, kan gekookte eiers of koue hoendervleis insluit. Jy kan ook jou eie suigysies maak deur sap te vries.
DIT AF!
’n Kort, praktiese nuwe haarstyl sal jou nek koel hou en sommer wip in jou stap sit. As jy dit ooit oorweeg het om kortpad te kies, is dit nou die tyd!