Fliek toe! OF NIE?

Om te gaan fliek is so deel van die vakansie soos swem en roomys eet. Maar jou kind se reaksie kan jou dalk onkant vang ...

is die prente op die skerm enorm. Die 3D-brille maak alles net nog meer oorweldigend.

Dis baie anders as by die huis, waar ma verby die bangmaaktonele kan spring of die pouseknoppie kan druk om gou eers te verduidelik wat gebeur.

Maar tog wil ’n mens jou kind nie die bekoring van die bioskoop ontneem nie. Met die grootskerm-riglyne hieronder kan jy sorg dat haar fliekjare positief én prettig is.

DOEN JOU HUISWERK

Moenie sommer aanvaar dat ’n fliek geskik is vir jong kinders net omdat dit kindvriendelik lyk nie.

Doen jou eie navorsing deur met vriende te praat wat reeds die betrokke fliek gesien het. Benut die internet – daar is ’n handvol webtuistes met ouer-georiënteerde resensies wat vertel waaroor die fliek gaan en watter tonele jou kind dalk kan ontstel of bang kan maak.

Dit beteken nie jy moet elke fliek vermy wat ’n vreesaanjaende of moeilike onderwerp het nie. Dit gaan oor tydsberekening. Op die regte ouderdom kan bangmaak- of verwarrende materiaal kinders emosioneel begin voorberei vir wanneer soortgelyke situasies in die werklikheid opduik. Dit kan opwindend en verrykend wees.

As jy daaraan dink om ’n potensieel ontstellende fliek saam met jou vyfjarige te kyk – dalk iets waarin ’n karakter doodgaan – vra jou af of jou kind gereed is vir die emosies wat ’n mens ervaar as jy so ’n verlies gadeslaan. As jy dink sy is nog nie gereed om dit te hanteer nie, moet julle liefs wag tot sy ’n bietjie ouer is.

Jou sewejarige is dalk al baie gemakliker in die bioskoop, maar kan steeds te jonk vir sekere tonele wees.

KEN JOU KIND

Onafhanklike raad en deskundige riglyne help baie, maar dis ewe belangrik – dalk selfs belangriker – dat jy jou kind se temperament en omstandighede in ag neem. Dink ook aan wat by die huis aangaan en wat jou kind se spesifieke vrese is.

As julle die eerste keer gaan fliek, moet jy vooraf verduidelik dat die ligte afgeskakel gaan word en dat sy vir ’n rukkie sal moet stilsit voor die prent begin. Maak dit duidelik dat sy nie verplig is om in die teater te bly nie. Vertel haar dat daar ’n badkamer sal wees en dat daar ’n goed verligte portaal net buite die deur is.

Dit is ook belangrik om die basiese besonderhede van die fliek te verduidelik voor julle dit gaan kyk. Beskryf die storie en praat oor die karakters. As die storie in Parys afspeel, vertel haar baie eenvoudig wat en waar Parys is. So sal jou kind minder worstel om te probeer verstaan wat in die fliek aangaan en meer tyd daaraan bestee om dit net te geniet.

Soms is die groot skerm net te oorweldigend vir kleintjies.

BEPLAN MOOI

Stel jou voor hoe senutergend dit vir ’n baie jong kind moet wees om oor die parkeerterrein te hardloop en die donker teater binne te storm net oomblikke voor die hoofvertoning begin.

Gun julle meer as genoeg tyd om by die vertoning te kom, springmielies te koop en die beste sitplekke te kry. Dit beteken om sitplekke te kies wat ver genoeg van die skerm af is en reg langs die paadjie is sodat julle maklik kan in- en uitgaan.