Liewe Baba & Kleuter
Verbeel jou jy kan nie behoorlik met jou baba kommunikeer nie …
Vir baie gesinne in Suid-Afrika is dít ’n werklikheid, want daar word elke dag 17 dowe babas in Suid-Afrika gebore. Meer as 94 persent van hulle het ouers wat wel kan hoor, en dit kompliseer dinge verder omdat hierdie ouers niks van doofheid weet nie en dus oorweldig voel wanneer hulle hoor hul kind het gehoorverlies.
’n Baba met gehoorverlies of doofheid en sy gesin het spesifieke ondersteuning nodig omdat die vermoë om te kommunikeer regstreeks verband hou met ’n kind se brein- en sosio-emosionele ontwikkeling.
HI HOPES Early Intervention Programme is die vlagskip van Wits-universiteit se Sentrum vir Dowe Studies. Hierdie projek is begin om te identifiseer wat gebeur wanneer ’n gesin nie leer hoe om met ’n dowe kind te kommunikeer nie. Die werklikheid was ook dat kinders met gehoorverlies nie soveel geleenthede kry as kinders wat kan hoor nie, veral omdat hul taalontwikkeling gewoonlik agterstande toon.
HI HOPES bied hul diens reeds in vyf provinsies aan en verskaf gratis ondersteuning aan gesinne met babas wat doof of hardhorend is. Ons dienste is beskikbaar vir babas met enige soort gehoorverlies.
Die huisomgewing bied eindelose geleenthede vir taalontwikkeling; daarom bied ons ons diens in die gesin se eie huis aan. Eerstens kry die ouers emosionele ondersteuning om hulle te help verstaan wat dit behels om ’n kind met gehoorverlies groot te maak. Ten tweede word onpartydige inligting met die gesin gedeel sodat hulle ingeligte besluite kan maak oor wat die beste vir hul dowe baba is. Hulle word geleer om taalontwikkeling en luistervaardighede te optimaliseer as die kind wel ’n bietjie kan hoor, of toegang het tot tegnologie soos gehoorapparate of ’n kogleêre inplanting.
Ons vervang nie die kind se professionele span nie, maar dien as versterking vir die hele gesin.
HI HOPES het ook ’n mentorprogram waar dowe mentors by gesinne aanklop om die ouers te wys hoe om met hul dowe kind te kommunikeer.
HI HOPES is ’n vennoot van die THRIVE-ouersteungroep sodat ouers mekaar kan ondersteun. Ons hou in gedagte dat elke kind anders en elke gesin verskillend is, dus word die kind se taal, kommunikasie-ontwikkeling en algehele ontwikkeling in ag geneem om te besluit wat die regte keuse vir hom of haar is.
Om gratis steun aan gesinne te bied, het ons jou ondersteuning nodig. Skenkings (eenmalig of maandeliks), geldinsamelings en liefdadigheidsgeleenthede is alles welkom – as jy aan ’n manier kan dink om vir ons geld in te samel, sal ons dit werklik waardeer!