BABAKLERE:
Twee innoverende Kaapse pa’s, Paddy Muldoon en Chris Baff, maak ouerskap makliker deur babaklere met nanotegnologie toe te rus.
VERTEL ONS OOR JULLESELF. Chris: Ek is gelukkig genoeg om drie meisies in my lewe te hê: my vrou, Caroline, en twee dogters, Annabelle (amper 5) en Emily (3). Om ’n pa te word is soos om ’n kitsverantwoordelikheidspil te drink: Dit gaan skielik nie meer net oor jou en jou vrou nie; alles draai om jou kinders en om te doen wat die beste vir hulle is. Paddy: Ek en Kirsten is al 11 jaar saam, ses daarvan getroud. Ons seun, Odinn, is nou byna vier. Ek en Chris is gelukkig dat ons vroue ons baie goed ondersteun. Hulle het met die begin van Parental Instinct – die naam van ons onderneming – baie insette gelewer en doen dit steeds, alles op hul ervaring, belangstelling en passies gegrond.
WAAR HET PARENTAL INSTINCT ONTSTAAN? Chris: Ons rolle as betrokke pa’s was die katalisator. So baie van ons idees vir ons produkte spruit direk uit ons eie lewe en ervarings met ons kinders, wat ons baiekeer laat wonder het hoekom babaklere nie ouers se lewe makliker maak nie.
VAN DIE SPORT-EN-BUITELEWE-BEDRYF NA BABAKLERE IS ’N GROOT SPRONG ... Paddy: Ons dink baie mense was verras toe ons aangekondig het ons gaan ’n babahandelsnaam begin. Die meeste mense het waarskynlik verwag dat ons iets sou doen oor sport of die buitelewe, maar in daardie stadium het ons albei klein kindertjies gehad en die heeltyd gevra hoekom al die fantastiese tegnologie nie vir kinders beskikbaar was nie.
Uit daardie oogpunt was dit dus nie so ’n groot sprong na die gebruik van tegnologie en innovasie nie. Ons het gekyk na alles wat ons vir ons kinders gebruik en wat ons gevoel het die sleutelelemente van al ons produkte behoort te wees, en daarop gebou.
HOEKOM DINK JULLE HET NIEMAND VROEËR DAARAAN GEDINK NIE? Chris: Dit was waarskynlik net nie op ander mense se radar nie. As ’n mens in die babaklere-bedryf werk, is die kans goed dat jy nie baie hoëvlak- tegniese uitstallings sal bywoon en waarskynlik nie dieselfde innoverende ingesteldheid sal hê as in die sport- of buitelewe-bedryf nie.
Ons albei kom uit ’n agtergrond waar die norm uitgedaag word, en ons was dus nie bang om dinge te verander en hierdie innovasies deur te trek na babaklere nie. Voorbeelde is vlek- en morsbestande materiale, UV-beskerming en selfs muskiet- en goggaafweringstegnologie en vinnigdroogwordmateriaal vir swemdrag.
DIE MOEILIKSTE DEEL VAN JUL PAD? Paddy: Daar is twee dinge wat baie moeilik was. Om mee te begin: burokratiese rompslomp. Dis ongelooflik moeilik vir ’n beginneronderneming om te registreer, bankreke- ninge oop te maak, telefoonrekeninge, BTW en ’n miljoen ander dinge aan die gang te kry. Dit verg tyd en geduld en hoewel jy dit uiteindelik regkry, is dit baie frustrerend.
Die ander uitdaging was om heeltemal van nuuts af te begin met geen geskiedenis van enige aard om ons besluite te rig nie. Ons moes ons eie patrone, grootte-graderings, verskaffersbasis en alles wat met die ontwikkeling van ’n produk gepaardgaan, opbou.
Waar ons voorheen vir handelsname gewerk het, was ’n groot deel daarvan reeds gedoen, maar nou moes ons letterlik ’n leë bladsy invul. Ons was wel gelukkig om bande te hê met talentvolle ontwerpers, fotograwe en handelsnaamkenners wat ons ook waar nodig gehelp het.
HUMOR SPEEL ’N GROOT ROL IN JUL BEMARKING ... Chris: Die hele idee van ons handelsnaam is dat ons bestaan om ouerskap makliker te maak. Dit is klaar ’n baie ambisieuse doel omdat ouerskap een van die mees intense en tog ook meer lonende reise is wat die mens aflê, maar ons sou sekerlik nie daardie eerste paar jaar oorleef het sonder ’n sin vir humor nie.
Dit het gehelp om alles ’n bietjie makliker te maak, en ons wou dit dus – saam met ’n gevoel van bemagtiging – deel laat vorm van ons handelsnaam-eienskappe. Om ’n persoonlikheid vir ons handelsnaam op te bou, was een van ons sleutel-fokusareas: Verbruikers moet voel hulle wil ’n persoonlike verhouding met Parental Instinct opbou.
Gaan na www.parental-instinct.com vir nog inligting.