VLIEG JULLE EUROPA TOE?
Het jy geweet jy kan vergoeding eis van die lugredery as jou gesin verontrief is deur ’n vlugvertraging, gekanselleerde vlug of oorbespreekte vlug? Die rompslomp kan egter maande duur …
Maak die proses makliker deur die webtuiste www.planeclaim.org te gebruik. Dit kos 30 sekondes om jou besonderhede in te vul en jy sal binne 12 uur hoor of jy ’n eis het. PlaneClaim hanteer alles namens jou in ruil vir 25 persent van die bedrag wat uitbetaal word, gewoonlik tussen 125 en 600 euro. Met die wisselkoers is dit mos ’n lekker bedrag! In sommige gevalle kan jy eis vir vlugte wat al drie jaar tevore deurmekaargekrap is. PlaneClaim is die breinkind van ’n Johannesburgse ma van vier, Maria Findt, wat eenkeer self verontrief is deur ’n laat vlug toe sy met haar kinders Europa toe wou reis.
ABC, NET MAKLIKER
Disleksielyers, staan nader! Daar is nou ’n slim font wat jy by www.dyslexiefont.com kan koop teen R249. Dié lettertipe, met die naam dyslexiefont, is spesiaal ontwerp om lees vir disleksielyers makliker te maak. Jy installeer dit op jou rekenaar en kan dit in feitlik al jou programme gebruik.
BABAVRIENDELIKE UITEETPLEKKE
As jy die regte restaurant kies, kan uiteet met jou baba of kinders ’n plesier wees. Kies jy egter verkeerd … Spaar jou die drama deur op zomato.com/southafrica te soek of hul toep te gebruik om hul lys babavriendelike restaurante te vind. Die inligting word bymekaargetrek uit gebruikers se aanbevelings en ervarings. Neem self ook deel om ander te help. Benoem babavriendelike restaurante waarvan jy weet deur #BYYFriendly in al jou sosialemedia-kommunikasie te gebruik.