BABA BEGIN EET die 1ste 60 dae
Ons het al die dinkwerk en beplanning gedoen sodat jy baba se kosgee so maklik moontlik kan maak. Begin met dié plan – aanstaande maand plaas ons die opvolgplan.
Lewenslange kosvoorkeure word gevorm in die eerste ses maande wat jou baba eet en ’n goeie eetplan sal jou help om vroeg reeds gesonde eetgewoontes vas te lê. Hierdie plan leer jou baba om kosse met verskillende smake, teksture en kleure te eet sodat sy goed bekend is met ’n wye verskeidenheid kosse teen die tyd dat sy een jaar oud word. Dit sal die kans vir kieskeurigheid drasties verminder.
BEGINSELS VAN BABAVOEDING
Wanneer jou baba gereed is om te eet, sluit ons elke vierde dag ’n nuwe kossoort in. Die nuwe kos word soggens drie dae ná mekaar in klein hoeveelhede gegee voor dit die res van die dag in groter hoeveelhede gegee word. So sal jy makliker kan agterkom watter kos die sondaar is as jou baba ’n ongewenste reaksie wys soos ’n uitslag, braking of diarree. Dit gee jou baba ook kans om gewoond te raak aan die nuwe kossoort en daarmee bekend te raak.
HOEVEEL MOET BABA EET?
Die hoeveelhede in die eetplan dien slegs as ’n riglyn. Jou baba se honger- en versadigingsboodskappe bepaal hoeveel sy moet eet. As sy aandui dat sy nog honger is, kan jy nog van dieselfde kos gee. As sy nie alles eet nie, moet jy haar nie haar aanmoedig deur speletjies te speel of haar aandag af te trek nie. Moet haar ook nie dwing om meer te eet nie.
Wanneer sy stadiger begin eet, belangstelling verloor en begin rondkyk of speel, haar kop wegdraai, haar mondjie toeknyp of kos wegstoot, is sy versadig. Die oomblik dat jou baba die eerste tekens van versadiging toon, behoort jy die kos weg te neem.
Die eerste twee dae wat ’n nuwe kossoort gegee word, word eers een teelepel en dan een eetlepel gegee. Dis omdat allergiese reaksies soms erger is as die hoeveelhede groter is. Hou dus by hierdie hoeveelhede. Hou ook by die vleisporsie wat aangedui is aangesien navorsing ’n verband wys tussen groot hoeveelhede proteïne by babas en oorgewig.
KOOKSKOOL
Tuisgemaakte babakos is die beste keuse om verskeie redes: • ’n Groter verskeidenheid is beskikbaar. • Dit is nie te fyn nie en kan maklik stelselma
tig growwer gemaak word. • Dit proe soos mamma se kos. • Kosse kan apart gegee word, wat baba help
om verskillende kosse te leer ken. • Dit kan inpas by wat die res van die gesin eet. Met die uitsondering van appel kan alle vrugte rou gegee word. Alle stysel, vleis en groente word gaargemaak, met die uitsondering van rou slaaigroente later. Was vrugte en groente goed met ’n borseltjie onder lopende water af. Waar nodig, skil af en stoom in ’n stomer of kook vinnig in ’n klein bietjie water. Aanvanklik sal alle kos met ’n stokmenger of voedselverwerker gepuree word. ’n Klein hoeveelheid melk of van die water waarin dit gekook is kan indien nodig bygevoeg word. Wees egter versigtig vir te veel water omdat sommige groente heelwat water trek wanneer dit gevries word. As die puree te styf of droog is, kan jy liewer net voor baba eet ’n paar druppels kanola-, olyf- of avokado-olie byvoeg. Maak alle kos apart gaar en vries in ysbakkies wat een tot twee eetlepels per ysblokkie hou. Kosse kan op hierdie manier maklik apart of in verskillende kombinasies gegee word. Begin reeds van vroeg af om kos geleidelik growwer te maak; jou baba sal growwe teksture dan makliker aanvaar.
EN MELK?
Jy kan drie dae voor jy met vaste kos begin, koeimelk by jou baba se dieet begin insluit, indien jy jou baba eksklusief geborsvoed het. Gee dit net so skoon of gemeng met uitgemelkte borsmelk. Bied dit aan in ’n lepel, koppie of bottel. As jou baba geen reaksie het nie, kan jy volroom-koeimelk of natuurlike volroomjogurt gebruik om met ysterverrykte babapap of enige ander kos te meng.
Let wel, as jy borsvoed word jy aangeraai om aan te hou borsvoed vir solank jy kan.
Ma’s wat koeimelkgebaseerde formulemelk gee hoef nie eers dié oefening te doen om te toets vir reaksie nie.
Navorsing wys dat ons die koeimelk juis moet gee om te help om allergieë te voorkom. Baie kommersiële babakos bevat koeimelk.
Onthou, skoon koeimelk kan eers van ’n jaar af as drankie gegee word.