LEES & word slim!
Van babas tot stylvolle ampertieners sal groot pret hê met die boeke wat vandeesmaand op ons leeshoekierak staan.
PRET VIR STYLVOLLE MEISIES
Ouer meisies sal hierdie reeks vreeslik geniet. My Model: Modeprinses en Modester bevat swart- wit prente wat ingekleur kan word en daar is ook twee bladsye met plakkers wat jou kind kan inspan om haar eie funky en unieke klerereeks te ontwerp. Rock glam op sy beste! Human & Rousseau, R89,95.
WOORDE VIR SLIMMIES
Leer ken woorde is ’n reuseboek met ’n kombinasie van helder foto’s en stimulerende vrae wat jou kind se woordeskat uitbrei en eenvoudige temas soos kleure, kos en drinkgoed, diere, vorms en getalle bekendstel. Hierdie boek is ideaal vir beginnerlesers. Human & Rousseau, R140.
TWEE ONGEWONE MAATS
Jeff en George en die totempaal is ’n oulike en hoogs vermaaklike boek. Die illustrasies is iets besonders en is deur Julia Anastasopoulos behartig, terwyl Emily Child vir die teks verantwoordelik is. Jeff, ’n seuntjie, en George, ’n springbok, maak ’n plan met ’n tower-reënjas sodat hulle op ’n Kaapstadse reëndag buite kan speel sonder om nat te word. Penguin Random House, R140.
MOENIE, MOENIE!
Moenie die knoppie druk nie! is ’n lawwe, holderstebolder storie met twee oulike karakters, Tiaan en sy kleinboet. Dis deur Jaco Jacobs geskryf en die helderkleurige illustrasies is deur Chris Venter. Die teks is groot gedruk sodat jou beginner-lesertjie dit maklik sal kan lees. Dit is ook geskik vir voorlees vir driejariges en ouer. Lapa Uitgewers, R109,99.
BABA SE EERSTE BOEKIES
My eerste woorde en My eerste kleure is twee dik kartonboekies ideaal vir babas en peuters. Dit bou jou kind se woordeskat en leer hulle kleure ken met behulp van die pragtige kleurfoto’s. Penguin Random House, R90 elk.