VINNIGE, GESONDE ONTBYT
My kinders is vanjaar albei op kleuterskool. Wat is die beste vinnige ontbyt vir hulle? Ons het nie soggens baie tyd nie en hulle is maar traag om te sit en eet.
ANEL KIRSTEN ANTWOORD:
Dit sal wonderlik wees as ons elke oggend ’n hotelontbyt van vrugte, jogurt, heelgraan-ontbytkos en eiers kan voorsit, maar dit kan nogal moeilik word as ’n mens haastig is om jou en die kinders vir skool en werk gereed te kry.
Die ideale ontbyt sluit in ’n kombinasie van koolhidrate, proteïen en vesel. Koolhidrate is ’n onmiddellike bron van energie; proteïen en vesel laat jou kind versadig voel. Die vesel help ook om die spysverteringskanaal gereeld te hou.
Hier is ’n paar praktiese wenke vir daardie haastige oggende. • Maak seker daar is altyd gryp-en-geepad-opsies beskikbaar soos vars vrugte, individuele houertjies jogurt, klein pakkies onversoete droëvrugtevlokkies en onversoete vrugtestafies vir daardie oggende wanneer daar geen tyd vir eet is nie. • ’n Maaltyd-vervangerdrankie is altyd vinnig, gerieflik en kan voedsaam wees as die korrekte drankie gekies word. Maak seker dit bevat genoeg proteïen, min suiker en beskik oor ’n wye reeks vitamiene en minerale. • Maak ’n skommeldrankie die vorige aand en hou dit in die yskas. Meng vrugte, jogurt, ys, hawersemels (oatbran), vrugtesap of melk – jy kan selfs ’n bietjie weiproteïenpoeier byvoeg vir ekstra voedingswaarde. Supermarkte het ook soms skommeldrankies wat gereed is om gedrink te word – lees net die etiket versigtig! • Ontbytstafies is ook ’n vinnige opsie. Wees net versigtig: Baie ontbytstafies het amper dieselfde voedingswaarde as sjokoladestafies en bevat baie suiker. Lees die etiket deeglik voor jy die stafie in jou winkeltrollie pak. • Bak vooraf lae-GI-muffins wat soggens op pad skool toe vinnig gegryp kan word. Dit kan net so droog geëet word, of met ’n bietjie kaas. Daar is wonderlike resepteboeke beskikbaar met vinnige en maklike resepte vir muffins. • Vul individuele klein bakkies met heelgraan-ontbytkos wat hul sommer droog kan eet op pad skool toe. • Bak ’n korslose souttert en sny dit in blokkies wat ook met die hand geëet kan word. Dit is ook ideaal vir die kosblik. As ontbyt ’n probleem is en julle onder druk is, maak seker dat jy ’n goeie en gebalanseerde kosblik vir peuseltyd by die skool pak om vir die gebrek aan ontbyt te vergoed.
Sluit in vrugte, groente soos babatamaties en wortelrepies, neute, kasies, biltong, ’n lae-GI-toebroodjie met grondboontjiebotter of ’n ander proteïenvulsel, of ’n tortilla gevul met eier of hoender.