KLEUTER LOOP OP TONE
My driejarige loop op haar tone. Sal dit vanself regkom of het sy hulp nodig?
ANRO-MARI COHEN ANT
WOORD: Dit is algemeen dat kinders jonger as twee soms op hul tone loop. Die meeste kinders ontgroei dit en dié wat daarmee aanhou, doen dit meestal uit gewoonte.
Solank jou kind groei en normaal ontwikkel is toonlopery op sigself nie ’n rede tot kommer nie.
Dit is wel nodig om verdere ondersoek in te stel as jou kind: • Die meeste van die tyd op haar tone loop, • Stywe kuitspiere en enkels het, • Ongekoördineerd voorkom, • Ongemaklik loop en gereeld val, • Nie gewig kan dra wanneer sy plat op
haar voete staan nie, en • Sukkel om fyn motoriese vaardighede te bemeester. Soms loop kinders op hul tone weens ’n onderliggende toestand soos serebrale gestremdheid, spierdistrofie of ’n ander toestand wat spiere en senuwees aantas. Serebrale gestremdheid wat beweging, spiertonus en postuur beïnvloed kan veroorsaak dat die spiere styf trek en die haksening laat verkort. Dit veroorsaak op sy beurt dat die hak van die grond af lig.
Spierdistrofie is ’n aangebore toestand wat jou spiervesels swak maak.
Daar is ook soms ’n verband tussen toonlopery, taalprobleme en outisme. Dit is dus belangrik om seker te maak dat jou kind nie probleme met kommunikasie en interaksie met ander het nie.
As jou kind weens ’n fisieke probleem op haar tone loop, is daar verskeie behandelingskeuses. Fisioterapie sal fokus op strekke en mobiliseringsoefeninge. Soms kan spalkies en stutte ook ’n normale looppatroon aanhelp.
As hierdie konserwatiewe behandelings nie ’n verskil maak nie, is daar ook die moontlikheid van ’n operasie wat die spiere en senings aan die agterkant van die been verleng.