Sewe bakke slaai
Terwyl die lekker somerweer nog hou, kan julle gerus elke dag van die week slaai eet.
MAANDAG CAPRESE VIR KLEINGOED
Sny ewe veel kersietamaties en klein balletjies buffelmozzarella middeldeur. Ryg ’n stukkie tamatie, ’n stukkie mozzarella en een basilieblaar op ’n klein stokkie. Pak ’n hele bak vol van dié stokkies en bedruip dit met olyfolie en balsemiekasyn. Laat die kinders met die hand eet.
DINSDAG KNARSKOS VIR KINDERS
Maak guacamole deur een ryp avokado met sout, peper en baie suurlemoensap fyn te druk. Maak tzatziki deur ’n knoffelhuisie en ’n stuk komkommer van 5 cm lank by ’n koppie natuurlike volroomjogurt te rasper. Sit dié twee voor as doopsouse saam met repies soetrissie in verskillende kleure, komkommerstokkies, wortelrepies en lang stukke seldery.
WOENSDAG DRIEBOONSLAAI VIR WARM DAE
Maak 350 g groenbone gaar en dompel die bone dadelik in yswater. (Dis om die mooi helder kleur te behou.) Dreineer en sny in stukke van sowat 3 cm. Voeg ’n blik botterbone en ’n blik rooi niertjiebone by. (Eintlik sal enige bone werk – kyk maar wat jy in jou spens het.) Sny ’n rooi-ui baie fyn, plaas in ’n sif en giet kookwater oor. Voeg die uie by die bone. Maak slaaisous met ½ koppie olyfolie, ½ koppie appelasyn, 1 eetlepel mosterd en 1 eetlepel heuning. Giet oor. Laat ’n ruk staan en sit voor.
DONDERDAG NIÇOISE-SLAAI VIR MIDDAGETE
Pak ’ n laag botterslaaiblare onder in ’ n groot, vlak bak. Kook 10 baba- aartappels in hul skil tot gaar, laat afkoel, sny middeldeur en pak bo- op die blare. Dreineer ’ n blikkie tunastukke in water en rangskik vlokke daarvan in die bak. Sprinkel ’ n halwe blik gedreineerde mieliepitte bo- oor. Berei 4 hardgekookte eiers, skil en sny in kwarte en voeg ook by. Sny 2 tamaties in wiggies en voeg by. Voeg ’ n hand vol pitlose swartolywe by. Sny ’ n halwe rooi- ui in fyn repies, plaas in ’ n sif en giet kookwater oor. Voeg ook by die slaai. Bedruip jou niçoise met ’ n slaaisous van koppie olyfolie, koppie suurlemoensap en 1 eetlepel dijonmosterd.
VRYDAG LEKKERSTE BRAAISLAAI
Sny hapgrootte stukke van die volgende in ’n mooi slaaibak: ½ kropslaai, 2 tamaties, ½ komkommer, 2 fetawiele. Voeg ’n hand vol olywe by, asook fyn repies rooiui. Voeg dan blokkies avokado, blokkies geel soetrissie en croutons by. Maak die croutons deur stukke ou brood in blokkies te sny, met orego en olyfolie te besprinkel en dan teen 180 ºC in die oond te bak tot dit begin verkleur. Slaaisous: Druk ’n knoffelhuisie fyn en voeg dit by koppie olyfolie en koppie balsemiekasyn.
SATERDAG SPRUITE VIR JOU SPRUITE
Jy moet vroeg in die week met hierdie een begin … Skaf ’n mengsel van spruitsade aan soos kekerertjies, mungbone, lensies, alfalfa, radys, sonneblom, bronkors en fenegriek. Vra sommer by die gesondheidswinkel vir ’n voorafgemengde mengsel en aanwysings. Jy sal die sade oornag moet laat week en dit daarna twee keer per dag afspoel. Laat die kinders jou help. Afhangend van hoe warm dit is, kan jy verwag om binne vier tot ses dae heerlike spruite te hê. Eet hulle net so of voeg by enige van jou ander slaaie, of by ’n roerbraai, of sit dit selfs op ’n toebroodjie saam met mayonnaise. Supervoedsaam en gesond.
SONDAG KOOLSLAAI VIR DIE MASSAS
Kap die volgende in jou voedselverwerker fyn: 1 klein wit koolkoppie, 1 klein rooi koolkoppie, 2 middelslag-wortels, 1 appel met skil, 1 groot vinkelbol. Voeg genoeg mayonnaise by om alles te bedek en voeg ook ’n handvol pitlose rosyntjies by. Eet dit Sondagmiddag saam met jul geroosterde varkboud.