Ma-entrepreneur
Lily Geerdts van Johannesburg is die dinamiese dryfveer agter Head Start Kids, ’n niewinsgewende organisasie gemik op die ontwikkeling van voorskoolse kinders.
HOE HET HEAD START KIDS ONTSTAAN? In 2006 het ek en my man, Arnold, oornag heeltydse ouers van sy seun uit sy vorige huwelik geword toe Kinah (nou 16) se ma aan motorneuronsiekte dood is. Sy ontwikkeling was agter en ons het saam allerhande uitdagings gehad. Gesonde kos, skoon water, gestruktureerde spel, leessessies, gehaltetyd saam en die beste beskikbare vitamiene and omegas het ’n daadwerklike en onmiddellike verskil gemaak. Ná net ses maande was hy ’n ander kind.
In 2011 het ons dieselfde pad gestap met ’n werknemer se seuntjie. Ook hy het met rasse skrede verbeter.
Dié impak op twee kinders met twee sulke uiteenlopende agtergronde het my laat besef dat ons ’n massiewe verskil kan maak, nie net aan kinders nie, maar ook aan die land se vooruitgang en die ekonomie. Met Head Start Kids (HSK) probeer ons om met gesonde voeding, beweging en verrykende onderrig ons land se minderbevoorregte jeug ’n beter wegspringplek gee.
GROOTSTE UITDAGINGS? Toe die idee van HSK begin ontkiem het en die implementering werklikheid moes word, moes ek baie versigtig deur vennootskappe sif om die regte mense betrokke te kry. Ek moes verder seker maak dat al die sleutelrolspelers as ’n eenheid saam sou werk om die holistiese aanslag wat ek graag wou hê moontlik te maak, want die sukses van HSK berus daarop. Die ander groot uitdaging was befondsing, maar noudat ons die meetbare bewyse kan lewer is die weg gebaan en ek glo groot maatskappye sal inspring om by te dra.
MOET ’N MENS ENTREPRENEURSVAARDIGHEDE HÊ VIR ’N NIE-WINSGEWENDE ORGANISASIE? Net soos ’n sakeonderneming het ons ’n probleem in die samelewing geïdentifiseer wat ’n oplossing nodig het. Met HSK verskaf ek ’n platform waar ’n verskeidenheid dienste bymekaargebring word om verandering te bewerkstellig en so ’n meetbare, gestruktureerde oplossing te bied. Ek is egter ’n sosiale entrepreneur, wat beteken my “besigheid” is nie op wins tot elke prys gegrond nie.
Die nuwe neiging by nie-winsgewende organisasies is om beleggers se geld te beskerm en dit slim aan te wend deur ’n professionele span byeen te bring wat op grond van hul werkdoeltreffendheid geëvalueer word. Hierdie model bied veel meer vir beleggers, en die geld wat in so ’n projek gestort word, vermag iets wat tasbaar is, omdat die kenners betaal word vir dit wat meetbaar is.
WATTER ROL SPEEL JOU EIE MOEDERSKAP IN HEAD START KIDS? Ek het vier kinders: Kinah, Corbin (27) en twee dogters, Lileah (9) en Shiloh (4). Hulle almal se fundamentele drang is om verstaan te word en liefde te kry. Konstantheid speel ook ’n baie groot rol in hul alledaagse lewe. Dit is presies dieselfde by die kinders in die townships en landelike omgewings met wie ons werk. Ons almal wil voel dat ons iewers hoort, dat daar ’n rol vir ons is en dat iemand vir ons omgee. By HSK glo ons dat om ’n kind, ongeag sy agtergrond, ’n stem vol hoop te gee, die sleutel is tot sy ontwikkeling.
HOE HANTEER JY DIE WERK-GESINBALANS? Supervroue bestaan net in strokieprente. Daar is tye wanneer die harde werk sy tol eis, maar ek is ook ’n heeltydse ma en daarom moes ons maar leer skietgee, kompromieë tref en liefhê. Enige vrou wat werk en ook ma is, weet watter uitdagings dit kan bring. Ek salueer ’n ieder en ’n elk van ons. Moederskap is nie vir selfsugtige mense nie.
VOORVEREISTES OM ’N SUKSESVOLLE SOSIALE ENTREPRENEUR TE WEES? ’n Entrepreneur het ’n visie met ’n langtermynplan en -strategie nodig. Ek is net so sterk as wat my netwerk is. En as ’n mens mooi daaroor dink, het ons almal ’n netwerk. Dit is hoe jy dit saamgooi en gebruik wat ’n verskil maak. Dryfkrag en passie is ’n verdere bonus. Die laaste faktor is relevante persoonlike ondervinding, want dit beteken jy was self in die loopgrawe en weet waarvan jy praat as jy oor oplossings gesels.
RAAD VIR MA’S WAT ’N NIE-WINSGEWENDE ORGANISASIE WIL BEGIN? ’n Nie-winsgewende organisasie is beslis nie ’n stokperdjie nie en is nie speletjies nie. Jy moet oopgestel wees vir insette van ander mense en soms ook vir raad waarmee jy nie saamstem nie, maar dit is kardinaal vir die groei van jou idee en programimplementering en -uitvoering. Jy moet jou ten volle verbind tot die projek en jy het sakke vol geduld nodig; baie deursettingsvermoë ook. ’n Mens het ook beter insig as jy self iets deurgemaak het. Dit gaan alles oor tydsberekening! Die mark se verwagtinge moet verstaan word en jy moet dan die oplossing na die mark toe neem. Luister ook na mense wat reeds die paadjie gestap het.
HOE BELANGRIK IS MENTORSKAP VIR SUKSES? Ek het die groot voorreg gehad dat die gholflegende Gary Player onmiddellik my droom verstaan het toe ek hom daarvan vertel het. Hy wou ook met kinders praat oor oefening, kos en ’n gesonde lewe, en het my uitgedaag om by sy plaasskooltjie op Blair Atholl ’n verskil te maak. Die impak was enorm en ná ses maande kon ek aan maatskappye my meetbare, tasbare syfers toon as bewys dat die drie idees – onderrig, gesonde voeding en beweging – saam as een werk. Arnold was ook ’n steunpilaar. Hy het my help slyp aan idees en denkrigtings en my bygestaan toe dit ’n paar keer gelyk het asof alles inmekaar wou tuimel.