Net liefde vir jou
Wat kan jy verwag van die band tussen jou en jou nuwe baba? Beproef ons sewe wenke om geboortebinding aan te moedig.
Kenners sê die band tussen ma en baba is die sleutel tot jou kind se sosiale, emosionele, intellektuele en fisieke ontwikkeling. Wanneer daar ’n sterk band tussen julle is, is jou kind van nature leergierig en het sy ’n gesonde selfbewussyn en meelewing met ander. Wanneer daardie band onseker is, kan jou kind aan haarself twyfel en dit moeilik vind om met die mense en die wêreld om haar te identifiseer.
In omvattende navorsing is bevind dat daar ’n sensitiewe tydperk net ná die geboorte is waarin ma’s en hul pasgeborenes geprogrammeer is om in nabye kontak met mekaar te wees en mekaar positief te stimuleer. Ma-en-baba-paartjies wat onmiddellik ná geboorte toegelaat word om te bind, het volgens dié navorsing in later jare ’n sterker band as die meeste ma’s en babas wat nie dadelik nabye binding beleef nie.
Binding is die voortsetting van die verhouding wat reeds in jou swangerskap begin het. Die fisieke en chemiese veranderinge wat in jou liggaam plaasvind, herinner jou aan daardie nuwe lewe in jou. Waar jy fisiek aan jou kind verbind was deur middel van bloedtoevoer in die baarmoeder, kan jy nou buite die baarmoeder met haar bind deur jou hele self tot haar beskikking te stel en al jou sintuie op haar in te stel.
WAT JY KAN VERWAG
Onmiddellike binding met jou pragtige mensie sorg vir ’n uitstekende voorsprong, maar binding bly eintlik ’n lewenslange proses van saamgroei. Jy en jou baba begin mekaar vroeg-vroeg gewoond raak en namate julle mekaar leer verstaan, ontwikkel dit jou vermoë om dadelik in haar behoeftes te voorsien en so ’n sterk band te skep.
Faktore wat onmiddellike binding egter uit jou hande neem sluit in aanneming, ’n vroeggebore of siek baba wat in die waakeenheid opgeneem word, herstel ná ’n geboorte, hormoonveranderings of uitputting en pyn ná ’n moeilike bevalling. Gelukkig is daar later meer as genoeg geleentheid om ’n onbreekbare ma-en-kind-band te vorm. Wees gerus, geen baba gaan onder ’n onsekere bindingsproses ly nie, solank daar net altyd in haar basiese behoeftes voorsien word. Binding vind geleidelik plaas en namate jou selfvertroue toeneem, sal jy jou baba se boodskappe leer verstaan en jou baba joune.