Op goeie voete
In een leeftyd dra ons voete ons drie tot vier keer om die wêreld. Maak dus van vroeg af seker dat jou spruit se voete gesond bly.
Selfs in ’n baba se piepklein voetjie is daar 28 beendere, 107 ligamente en 19 spiere, sowel as gewrigte en senings wat ondersteuning en beweeglikheid bied. Om jou kind in staat te stel om te hardloop, wip en spring, moet haar voete nie net stabiel en sterk wees nie, maar ook baie soepel. Dit is om dié rede dat jou kind se voete ’n baie spesiale struktuur het.
Ons moet ons kinders toelaat om soveel moontlik kaalvoet te hardloop, sê Nelfrie Kemp, ’n podiater (voetspesialis) en nasionale uitvoerende lid van die Podiatriese Vereniging van Suid-Afrika (PASA). Gelukkig is kaalvoet bly vir ons kroos baie makliker as vir hul eweknieë in die Noordelike Halfrond.
“Kinders moet net skoene dra wanneer hulle op ’n openbare plek is, soos in ’n winkelsentrum of by die skool, of om hulle teen die elemente te beskerm. As kinders kaalvoet op gras en sand loop en hardloop, of op ’n klimraam en in bome klouter, kry hulle kans om die intrinsieke spiere van hul voete en bene te oefen. Dit sal hulle goed te pas kom namate hulle ouer word,” sê Nelfrie.
Sy sê dis baie belangrik dat kinders se voete gereeld gemeet word. Anders as volwassenes se voete groei kinders s’n nog. Dit bestaan hoofsaaklik uit kraakbeen en die vorm verskil ook van grootmense s’n. Kinderskoene wat sleg pas, kan dus heelparty probleme veroorsaak wat hulle later as volwassenes sal inhaal. Maak dus baie seker jou kind se skoene pas korrek.
KIES HAAR SKOENE SO
• Jou kind se voete moet elke drie maande
gemeet word. • Daar moet ’n duimwydte tussen die punt
van die skoen en die langste toon wees. • Die sole van die skoen moet taamlik
reguit wees eerder as gerond. • Die skoen moet verkieslik veters, Velcro of gespes hê. Die hak moet ferm agter vasgehou word sodat dit nie te veel vorentoe kan beweeg nie. • Die deel van die skoen wat oor die bal van die voet pas, moet buigbaar wees, maar die agterkant moet ferm en stabiel wees. • Leer en seildoek is goeie materiale – dit is meer duursaam en laat meer lug deur as sintetiese en plastiekskoene. • Skoene moet ideaal gesproke ronde voor
punte hê om die tone meer plek te gee. • Geen skoen moet stukkend wees of eers ingeloop word nie. As dit ingeloop moet word, is dit swak ontwerp of pas dit nie goed nie.
BLY SO VAS OP DIE VOETE
• Ondersoek jou kind se voete gereeld. • Laat jou baba toe om vrylik te skop sodat normale spiereontwikkeling kan plaasvind. • Moenie jou kind dwing om te loop nie. Kinders kan enige tyd tussen 10 en 18 maande begin loop. • Moedig kaalvoetloop aan op geskikte oppervlaktes soos sand, gras en matte om spieraktiwiteit en -ontwikkeling aan te moedig. • Skoen- en sokkiegrootte moet volgens die
voetgroei aangepas word. • Enige klagte moet ernstig beskou
word.
GAAN PODIATER TOE AS:
• Jou kind se skoene ongelyk uitgetrap is, • Knoppe of bulte op die voet sigbaar is, • Pyne in die voete en bene ontstaan, • Jou kind gereeld struikel of val, of • Daar vel- of toonnaelprobleme is.