MY BABA KRY HEELTYD KOUD
Dit lyk of my pasgeborene heeltyd koud kry.
DR. H.P VAN DER MERWE ANT
WOORD: Die normale temperatuur vir babas is tussen 36,5 en 37,5 grade Celsius. In die eerste drie maande kry jy die akkuraatste meting deur sy temperatuur rektaal te meet.
Pasgeborenes en babas se temperatuurregulering is in die eerste paar weke nie goed ontwikkel nie. Dit geld vir hitte sowel as koue. Die verhouding tussen ’n baba se veloppervlak en sy massa is drie keer groter as dié van ’n volwassene en in die geval van vroeggebore en groeivertraagde babas is die verhouding nóg groter. Dit beteken dus dat babas baie blootgestel is aan hitteverlies deur hul velletjie.
Verdamping soos met badtyd, kontak met koue oppervlakke, nabyheid aan koue vensters en koue lugvloei oor die baba is alles dinge wat hom kan laat afkoel.
’n Baba se reaksie op koue is beperk en hulle kan byvoorbeeld nie bewe om hitte te genereer nie. Hulle beweeg ook nie juis hul spiertjies om warm te word nie, en die bloedvate in hul vel is nog nie doeltreffend genoeg gevorm om hitte na binne te gelei nie.
Wanneer hulle koud kry, produseer babas dus hitte deur gebruik te maak van die verbranding van ’n spesiale soort vet wat bruinvet genoem word. Bruinvet kan nie vervang word nie en verdwyn teen drie tot ses maande oud. Dit sal dus gouer verdwyn by babas wat aan koue strestoestande blootgestel is.
Die energiegebruik tydens verbranding van hierdie vet is geweldig hoog en babas wat aan kouestres blootgestel word, sal dus onder meer nie goed gewig aansit nie.
Vroeggebore babas, siek babas en babas wat klein is vir hul ouderdom, loop die grootste gevaar vir hipotermie. ’n Lae liggaamstemperatuur kan ook ’n teken van ’n onderliggende siekte soos sepsis ( bloedvergiftiging) wees. Gevaartekens sluit in dat baba swak drink en prikkelbaar of lusteloos lyk.
Aan die ander kant kan ’n mens gerus wees dat ’n baba wat aktief is, goed drink, rustig slaap en mooi gewig aansit, nie besig is om te warm of te koud te kry nie.
Gesonde en voltermynbabas sal teen die tyd dat hulle huis toe gaan in staat wees om hul liggaamstemperatuur in normale omstandighede te behou. As dit nie gebeur nie, moet ’n dokter geraadpleeg word.
Onthou net om jou baba nie te warm aan te trek of te warm onder die komberse toe te maak nie, want daar is ’n verband tussen oorverhitting en wiegiedood.