Verbeel jou dit!
Speel-speel-aktiwiteite is nie net speletjies nie – dis een van die beste maniere om jou kind se kreatiwiteit en toekomstige vaardighede te ontwikkel.
Verbeelding is een van die wonderlikste vaardighede van menswees: om prentjies te vorm in jou gedagtes, iets op te maak, ’n wêreld te skep wat nie bestaan nie. En ons kinders doen dit moeiteloos.
VANAF 0 TOT 2 JAAR
Die fondament vir verbeeldingspel word in die eerste lewensjaar gelê. Die eerste tekens van jou kind se verbeelding is egter eers in die tweede lewensjaar te sien.
Studies wys jou kind sal tussen 19 en 22 maande gebeure kan begin visualiseer sonder dat hy dit self gesien het, ’n belangrike element van verbeelding. Jou peutertjie sal sy bekertjie as ’n karretjie begin inspan of haar pop sal ’n baba word wat sy aan die slaap sus.
2 TOT 4 JAAR
Jou kind se verbeelding bereik nou ’n hoogtepunt. Teen drie jaar begin verbeelding ’n besonder belangrike rol in jou kind se lewe speel en word dit ’n belangrike manier om meer oor die lewe te leer. Nog nooit was Kersvader vir hom so werklik soos nou nie en sy spel is deurspek met verbeeldingsvlugte. Hy sal egter sukkel om werklikheid en verbeelding te skei – wat kan veroorsaak dat hy die verskriklikste stories vertel en dit self glo! Sy nuwe verbeeldingskrag kan ook lei tot meer vrese, soos vir die monsters onder sy bed. ’n Onsigbare maatjie is nou ook algemeen.
4 JAAR EN OUER
Teen vier jaar oud kan jou kleuter stadigaan begin onderskei tussen werklikheid en fantasie en besef dat hy nie die modderkoekie werklik moet eet nie. Op sewe sal hy waarskynlik weet Kersvader bestaan nie werklik nie, maar steeds graag saamspeel. Sy verbeelding is steeds baie aktief, maar hy kan verleë voel as jy hom betrap waar hy speel hy is een van die drie helde in PJ Masks. Hy kan sy verbeelding uitleef deur stories op te maak, of selfs sy eie boeke skryf en illustreer.
Dink saam met jou kind verspotte stories uit – hy sal gek daaroor wees.