Braxton wat?
Menige vrou is al terug huis toe gestuur nadat sy hospitaal toe gejaag het onder die indruk dat haar kraampyne in volle gang is. Onderskei ware en fopkontraksies só van mekaar.
HOE VOEL DIT?
Namate jy die einde van jou eerste trimester nader, voel jy soms hoe jou maag stywer trek. Dit word veroorsaak deur die hormoon estrogeen, en gebeur ook omdat die baarmoeder rek.
Braxton Hicks-kontraksies behels gewoonlik ook dat jou bloeddruk, polsslag en die druk in jou baarmoeder effens verhoog, en dit neem in die laaste ses weke van swangerskap toe. Dit streel jou baba en help jou om vir die bevalling te oefen.
HOEKOM GEBEUR DIT?
Daar word gereken dat Braxton Hickskontraksies help om die senupaadjies te ontwikkel wat jou liggaam later nodig gaan hê om ware kontraksies te koördineer. Dit help moontlik ook om die serviks vir die bevalling voor te berei, en daarom word dit soms oefenkraam genoem.
As dit jou eerste baba is, is die kans goed dat die Braxton Hicks-kontraksies ongesiens en ongevoel verby kan gaan tot heelwat later in jou swangerskap.
’n Vrou wat ’n meerling of haar tweede of derde kind verwag, gaan meer bewus daarvan wees en dalk selfs ’n bietjie meer ongemaklik voel terwyl dit voortduur.
In teenstelling met kraamkontraksies het Braxton Hicks-kontraksies geen patroon nie. Dis pynloos en ongereeld. Sommige kontraksies is baie kort, terwyl ander taamlik lank kan duur. Soms kan jy hierdie kontraksies net voel wanneer jy jou hand op jou maag sit.
Later in jou swangerskap word Braxton Hicks-kontraksies ook fop-kraamkontraksies genoem en baie vroue verwar dit met die ware Jakob.
HANTEER BRAXTON HICKS-KONTRAKSIES S0
Leer sommer nou al om Braxton Hickskontraksies met die hulp van ontspanningstegnieke te hanteer – dan is jy al ’n ou hand wanneer ware kraampyne die dag verskyn!
1Plaas
albei jou hande op jou maag en asem stadig in deur jou neus en uit deur jou mond terwyl jy jou mond in ’n “o” vorm. 2Hou
daarmee aan tot die kontraksie verby is. As die kontraksies plaasvind terwyl jy lê, draai op jou sy. 3As
jy besig is om oefening te doen, gaan staan handeviervoet en wieg jou lyf sagkens vorentoe en agtertoe.
WAT JY MOET WEET
• Pyn in enige stadium van jou swangerskap
is altyd ’n rede tot kommer. • Sametrekkings wat voel soos die begin van ’n maandstonde moet deur jou mediese versorger ondersoek word. • As daar enige vaginale bloeding voorkom, of as daar vloeistof uitdrup (dit kan vrugwater wees) wanneer jy hierdie sametrekkings het, moet jy jou dokter onmiddellik in kennis stel. • Blaasinfeksie kan ook met kontraksies verwar word. Simptome van ’n blaasinfeksie sluit die volgende in: ’n dringende behoefte om aanmekaar te urineer (veral in die nag, wat natuurlik in elk geval gebeur as jy swanger is), ’n brandende gevoel terwyl jy urineer en rugpyn of kwaai bekkenpyn.
Die een word beter onder ’n warm stort, die ander een word erger.