BEVORDER TV VERBEELDING?
Die probleem met televisie is dat dit namens jou kind visualiseer. Iets wat jou kind op televisie gesien het, kan dalk sy verbeelding aangryp – maar die werklike waarde daarvan kom eers ter sprake as jou kind dit in sy spel of in die praktyk verder voer e
DIE WONDER VAN VERBEELDING
Verbeeldingspel bied jou kind die geleentheid om sy gevoelens, drome en handelinge te integreer en plaas hom in ’n posisie waar hy sonder slegte gevolge kan eksperimenteer.
• DIT BEVORDER EMOSIONELE ONTWIKKELING.
As ’n kind oorweldig voel deur sy emosies, bied verbeeldingspel ’n uitlaatklep en ’n manier om dit te verwerk. Dit is byvoorbeeld in die haak as hy in die speletjie vir die pop kwaad raak en dit slaan, maar dis nie aanvaarbaar as hy sy sussie slaan nie.
• DIS ’N TEENVOETER VIR STRES.
Navorsing het gewys kinders met ’n goed ontwikkelde verbeelding hanteer stresvolle situasies oor die algemeen beter.
• DIT GEE KREATIWITEIT OEFENING EN MOEDIG UITEENLOPENDE DENKE AAN.
Fantasiespel daag jou kind uit om allerhande rolle te vertolk, van ’n dokter tot ’n renjaer. Dit help later met skoolwerk soos wiskunde, opstelle skryf en wetenskapsprobleme.
• DIT MOEDIG PROBLEEMOPLOSSING AAN.
In ’n studie is gevind kinders wat kleintyd verbeeldingryk was, bly die res van hul lewe so en word beter probleemoplossers.
• DIT HELP SIN MAAK VAN SY WÊRELD.
Deur verbeeldingspel lê jou kind alles wat hy sien en beleef vas en maak dit sy eie deur spel.
• DIT GEE BEHEER OOR UITDAGENDE SITUASIES.
As jou kind ’n slegte dag op die speelgrond beleef het, kan hy dit later in verbeeldingspel uitspeel, maar hierdie keer met beter gevolge.
• DIS GOED VIR SELFVERTROUE.
As jou peuter met iets sukkel, bied verbeeldingspel ’n manier om hierdie vaardighede te oefen en te voel dat hy sukses daarmee behaal.
• DIT ONTWIKKEL SOSIALE VAARDIGHEDE.
Rolspel help jou kind oefen hoe om in verskillende situasies op te tree en moeilike situasies te hanteer sonder die druk van die werklike lewe.
• DIT ONTWIKKEL WOORDESKAT.
Jou kind hoor stories of maak dit self op, en speel dit agterna uit.
• DIS ’N BOUBLOK VAN EMPATIE.
Deur verbeeldingspel kan jou kind ervaar hoe dit voel om in ’n ander se skoene te staan. Dit lê die grondslag vir empatie.
• EN ’N VOORDEEL SPESIAAL VIR MA’S?
Jy hoef nie ’n verbeeldingryke kind besig te hou nie. Hy sal self iets uitdink!
ONTSNAPPING DEUR VERBEELDING
Die Mahikengse sielkundige Lenmarie Stanton sê fantasiespel laat jou kind toe om positiewe en negatiewe emosies uit te druk.
Dit help ook om sy kognitiewe aanpasbaarheid en kreatiwiteit te verfyn.
“Navorsing wys dat gelukkige en gesonde kinders meer daartoe geneig is om hulle in ’n fantasiewêreld uit te leef as ongelukkige kinders. Fantasiespel verteenwoordig ’n sielkundige proses waarin ’n kind leer om die gaping tussen kennis, werklikheid en ervaring te oorbrug. Dit
sal eendag in sy volwasse lewe’ n belangrike hantering s meganisme wees .”
En hoewel verbeelding kinders help om situasies te hanteer, help dit hulle ook om aan situasies te ontsnap.
Daar is kinders wat voortdurend na ’n verbeeldingswêreld padgee as die druk van die regte wêreld te veel word. Hoewel dit belangrik vir hul ontwikkeling is dat hulle soms hul eie wêreld skep, is dit ’n probleem as hulle heeltyd na hul eie wêreld ontsnap eerder as om in die regte wêreld te funksioneer – soos wanneer kinders voortdurend verbeeldings maats bo regte vriende verkies.