Leeshoekie
Vandeesmaand is daar iets vir elke smaak op ons kinderboekrak.
SPITS JOU ORE Lees en luister: Eerste lesse-klankboek en Diere-klankboek is twee stewige boeke geskik vir drie- tot sesjariges. Dit stel jou kleuter en voorskoolse kind bekend aan getalle, kleure, vorms en teenoorgesteldes, en vertel ook meer oor die doen en late van ’n verskeidenheid diere. Wanneer jou kleuter met sy vingertjie op ’n prent druk, sal hy interessante feite en geluide, asook die naam van die dier op die prent hoor. Human & Rousseau, R235 elk.
BEKENDE BYBELSTORIES My eerste boek met Bybelstories bevat 12 bekende Bybelstories wat op ’n vars manier oorvertel word. Daar is ses bekende verhale uit die Ou Testament soos “Noag se ark” en “Josef se kleurvolle jas”, asook ses uit die Nuwe Testament, onder meer ”Die doop van Jesus” en “Die wonderwerke van Jesus”. Die illustrasies trek aandag en daar is net genoeg teks op elke blad dat jong lesers dit maklik sal kan lees en verstaan. Penguin Random House, R250.
IETS VIR DIE AGIES As jy ’n nuuskierige agie vir ’n kind het, is hierdie boek net vir hom of haar. My ensiklopedie van baie belangrike dinge is vir vyfjariges en ouer geskik. Dis vol feite wat jou kind help om die wêreld ’n bietjie beter te verstaan. Daar’s interessante temas soos diere, mense, planete, woestyne, vastelande, Vikings, farao’s en tale. Die temas word met treffende illustrasies, foto’s en eenvoudige teks uiteengesit. Lapa Uitgewers, R300.
UM, WAAR IS DIE KROK? Jy soek jou dalk lam na die krokodil in Daar’s nie ’n krokodil in hierdie boek nie, maar jy ontmoet darem genoeg ander bekende sprokieskarakters, van Aspoestertjie, Gouelokkies, die drie beertjies en Rooikappie tot Jan se boontjierank ... Dis ’n lekker lawwe storie en Jaco Jacobs se skreeusnaakse rymende teks sal ’n gegiggel waarborg. Die illustrasies is deur Chris Venter. Die boek is geskik vir driejariges en ouer. Lapa Uitgewers, R130.
IETS WAT JOU HART VERWARM Ben is ’n hardebandboek met 10 snaakse en hartverwarmende stories wat op vyf- tot agtjariges gemik is. Ben en sy troeteldierskilpad is onafskeidbaar en beleef ’n rits avonture, of dit nou is om ’n boomhuis te verower of in ’n duikboot te vaar. Die illustrasies is kostelik en die teks is groot genoeg vir beginnerlesers. Protea Boekhuis, R180.
IMMERGROEN SPROKIES Die Eerste sprokiesreeks bestaan uit sprokies wat al geslagte lank vir kinders vertel word. Rooikappie, Hansie en Grietjie, Die lelike eendjie en Die drie varkies is vier kinderboeke wat jou drie- tot sesjarige se verbeeldingswêreld sonder twyfel sal verryk. Die illustrasies deur Sophia Touliatou is prettig, helderkleurig en geskep om aandag te trek. Human & Rousseau, R85 elk.