Geheime sintuie
Kinders verken nie hul wêreld deur net te sien, voel, ruik, hoor of proe nie: ‘bewegingsintuie’ is net so belangrik vir gesonde ontwikkeling.
Jou liggaam is voortdurend besig om inligting te verwerk oor waar jy in verhouding tot ander dinge is, waar jou liggaamsdele ten opsigte van mekaar is, of jou spiere en gewrigte gespanne, ontspanne, gestrek of gebuig is, en wat jy volgende gaan doen – alles sonder dat jy twee keer daaroor dink. Jou kleuter se lyfie werk net so, behalwe dat hy sy bewegingsintuie nog moet verfyn en ontwikkel.
Die ervaring van beweging is ’n sintuig – jy kan immers “voel” jy beweeg al is jou oë toe. Daar is twee groot bewegingsintuie wat jou kleinding se beweging bepaal: die vestibulêre stelsel en proprioseptiewe stelsel. Wat beteken hierdie groot woorde en wat moet jy as ouer daaroor weet?