AS ’N INDUKSIE NIE WERK NIE…
Soms misluk induksies. In sulke gevalle kan ’n noodkeisersnee nodig wees. Prof. Lut Geerts van Kaapstad sê egter dat ’n noodkeisersnee ná ’n induksie net gedoen behoort te word as daar ’n baie dringende rede is soos fetale nood, dreigende baarmoederskeuring of wanneer die naelstring voor die baba gebore word.
“Dié komplikasies kan dikwels vermy word deur induksie versigtig by die spesifieke situasie te laat pas. Aggressiewe induksies maak komplikasies baie meer waarskynlik,” sê sy.
Soms voer ’n dokter ’n noodkeisersnee ná ’n induksie uit net omdat die induksie nie gewerk het en pasiënt nie begin kraam het nie, sê Lut. Dis nie ideaal nie. Die risiko daarvoor is groter as dit ’n eerste swangerskap is of as die amperma ’n ongunstige serviks het.
In ingewikkelde gevalle waar die verlossing werklik dringend is – soos as die ma stuiptrekkings kry – sal dokters aanvaar dat die moontlikheid van ’n keisersnee groot is.
In die meeste gevalle moet hulle egter liewer probeer om die induksie te laat slaag deur die proses byvoorbeeld meer tyd te gee om te werk, sê Lut.