WAT KAN VERKEERDLOOP?

Fontanelle kan te vroeg sluit, en daarom is dit belangrik dat jy weet wanneer dié sagte plekkies behoort te verhard. Die twee grotes bo-op die kop sluit onderskeidelik teen omtrent agt weke en 18 maande.

Die ander, wat aansienklik kleiner is en by die slape en ore van ’n baba voorkom, gaan sowat twee weke ná geboorte al toe.

Een van die komplikasies van fontanelle wat te vroeg sluit, is drukking op die brein omdat die groeiende brein dan skielik nie meer genoeg plek het om uit te sit nie.

Wanneer ’n baba se fontanelle verbeen voor sy brein ophou groei het, ly hy aan ’n toestand wat kraniostenose genoem word. ’n Baba met kraniostenose word soms sonder fontanelle gebore. In sulke gevalle sal daar onmiddellik chirurgies ingegryp word.

Die teenoorgestelde kan ook gebeur – die fontanelle sluit te laat. Dit is dikwels ’n aanduiding van ander probleme soos water op die brein, been-afwykings of’ n ontwikkelingsagterstand.

Al hierdie toestande is seldsaam, maar vra die dokter om jou baba se kop met roetinebesoeke goed te ondersoek.

MEER OOR KRANIOSTENOSE

Kraniostenose ontstaan wanneer die fontanelle te vroeg sluit. ’n Baba met fontanelle wat nog oop is, kan dit ook opdoen. Kenners reken sowat een uit elke 2 100 babas ly daaraan.

Genetiese of hormoonfaktore veroorsaak kraniostenose. Soms is die gevolg net ’n vreemde kopvorm, maar komplikasies soos swak sig en breinskade is ook moontlik.

VAN DIE SIMPTOME SLUIT IN:

• Geen fontanelle op die pasgeborene se skedel nie, • Sigbare en tasbare beenriwwe op die skedelnate, • ’n Vreemde kopvorm, en • Stadige of geen toename in kopomtrek namate die baba groter word. Die behandeling behels ’n operasie deur ’n neurochirurg om drukking op die brein te verlig, verkieslik binne die eerste ses maande van ’n baba se lewe.