Op ‘n uitstappie met baba
Die eerste uitstappie met jou pasgeborene is nie iets wat jy sommer net ligtelik aanpak nie. Volg ons wenke om te sorg dat dit sonder enige verrassings verloop.
Die resep vir ’n suksesvolle eerste uitstappie met jou baba is ’n goed gepakte doeksak, ’n bietjie ekstra beplanning en ’n rustige ingesteldheid.
Dit kan jou in elk geval net goed doen om saam met jou baba uit te gaan wanneer jy daarvoor gereed is. So nie, kan jy geïsoleerd en vasgekluister aan jou eie huis begin voel.
1WORD RUSTIG
Die grootste aanpassing met ’n nuwe baba is dat elke enkele ding meer tyd verg. Jy kan nie soos voorheen net in die motor klim en ry nie. Ma’s is gewoonlik verbaas om te ontdek dat dit hulle ure kos net om uit die huis te kom, want eers moet jy self aangetrek kom, dan moet baba gevoed, skoongemaak en aangetrek word, daarna moet jy die doeksak aanvul en dan ook sorg dat alles – baba inkluis – in die motor gelaai word.
Die uitstappie sal waarskynlik ook langer duur as wat jy beplan het – dit kos ’n hele rukkie om alles weer uit die kar te laai, en dan is daar die ekstra draaie wat jy moet loop omdat alle plekke nie stootwaentjie-vriendelik is nie. Dis dan dat jy moet onthou jy is met kraamverlof: Jou tyd is net joune en baba s’n. Wat maak dit saak as alles so lank duur?
Ontspan. Die ergste wat kan gebeur is dat jy dalk vroeër as beplan moet terugkeer huis toe. Haal dus dadelik drie keer diep asem en besluit om julle uitstappie te geniet!
2PAK SLIM
Pak die doeksak reeds die vorige aand om tyd te spaar en sodat jy weet alles is reg.
Tensy jy bereid is om jou uitstappie kort te knip, maak voorsiening vir die onvoorsiene, soos die moontlikheid dat jou baba ’n vuil doek gaan hê wat tot bo teen haar rug strek, of dat jy besmeer kan word. Die doeksak moet dus genoeg plek hê vir die volgende: • ’n Opvoubare ruilmatjie (nie alle plek
ke is ewe higiënies nie) • Vyf doeke • Vogdoekies • Boudjieroom • Antibakteriese sproei (ingeval die
doekruilplek nie skoon genoeg is nie) • Geparfumeerde sakkies waarin jy vuil
doeke kan weggooi • ’n Ekstra stel klere (of twee) • ’n Ekstra hemp vir jou • ’n Spoegdoek • Twee dun kombersies • Fopspeen • Jou selfoon • Jou beursie
3KIES DIE PLEK VERSIGTIG
Jou eerste uitstappie is dalk pediater toe, maar hou die volgende in gedagte vir meer sosiale uitstappies waar jy jou kleinding na ’n winkelsentrum, parkie of koffiewinkel neem: • Vermy plekke wat te besig en te vol is. Gesondheidskenners waarsku ouers teen plekke met groot getalle mense waar allerhande kieme kan skuil. • Kies ’n plek taamlik naby aan jou huis, sodat dit jou nie lank kos om daar te kom nie. In ’n krisis kan jy gou terugkeer huis toe. • Kies ’n plek waar jy self gemaklik voel en wat vir jou bekend is. Ideale plekke vir ’n eerste uitstappie is ’n parkie naby jou huis, of ’n koffiewinkel waar jy gereeld gaan koffie drink en jy die kelners ken. • Soek ’n babavriendelike omgewing. As jy gaan inkopies doen, kies ’n sentrum waar jy maklik met jou stootwaentjie by die nodige plekke kan uitkom en waar jy weet daar is ’n maklik bereikbare babakamer waar jy jou kleinding kan borsvoed of sy doek kan ruil. Dis goor om in ’n toilet te sit en borsvoed en dit voel nie higiënies nie. Hoor gerus by jou vriendinne wat goeie opsies is.
4KRY DIE TYDSBEREKENING REG
• Beplan die uitstappie rondom jou baba se skedule. Die beste tyd vir ’n uitstappie is gewoonlik reg ná ’n voeding en doekruiling. Sit dus alles lank voor die tyd gereed en sodra baba klaar gevoed is, kan julle net ry. Die meeste babas sal hierna slaap – en kan die hele uitstappie deur slaap! • Ruim ’n hele oggend in vir voorbereiding vir die uitgaanslag. Moenie afsprake vir te vroeg maak nie. • Hou die uitstappie kort. As jy beplan om langer as ’n uur weg te wees, besoek ’n plek waar jy gemaklik kan voed. • Kies ’n tyd wanneer daar nie baie mense is nie, soos ’n weekdag in die middel van die oggend. Dit maak dit makliker om ’n parkeerplek naby die ingang te kry, om jou inkopies vinnig af te handel en vinniger diens te kry, en jy sal self rustiger voel.