Smaaklike ete
Maak jou baba se kos interessant en bied ’n wye verskeidenheid aan. Dís hoe jy sorg dat fiemies nie in die peuterjare ’n houvas kry nie.
As jou baba al die kuns van eet bemeester het en die bakkies pap en puree met genot verorber, kan jy gerus na nuwe smake en teksture begin uitbrei. Ouer babas is reg daarvoor en geniet die hele verkenningsproses geweldig – dink maar aan ’n baba wat aan ’n suurlemoen proe. Die hele gesiggie sal vertrek van die suur, maar sy sal dit weer en weer mond toe bring.
Hou in gedagte wat jou uiteindelike doelwit is: ’n kind wat iewers tussen een en twee jaar oud eet wat julle eet en in ’n ontspanne bui aan gesinsmaaltye deelneem. Kies dus die smake en teksture wat julle as gesin geniet en begin om ’n baba-weergawe daarvan op te skep. Jy wil tog nie vir altyd twee keer hoef te kook nie.
Gebruik ons lys op die oorkantste bladsy as inspirasie en maak eenvoudig alles fyner na gelang van jou baba se kouvaardigheid. Hoe ouer die baba, hoe nader kan jy die kos aan die grootmensweergawe se tekstuur laat. Moet ook nie altyd alles saam in een bak gooi nie. Gee jou baba die geleentheid om te proe hoe elke deel van die maaltyd op sy eie proe. Moedig verkenning met die handjies aan – laat jou baba gerus toe om die kos self op te tel, of met ’n lepeltjie of vurkie te eksperimenteer.
Ontbyt
EIERS Jy hoef nie te wag om jou baba aan eiers bekend te stel nie. Hou haar maar net die eerste keer dop in geval sy een van die handjievol is wat ’n allergie daarvoor het. Jy kan haar roereier gee, maar moenie sout byvoeg nie. ’n Gekookte eier is koningskos vir ’n baba. Gebruik gepasteuriseerde eiers of maak seker die eier is goed gaar.
HAWERMOUT Jy kan jou baba se porsie opvrolik met ’n bietjie vrugtepuree of gerasperde appel en dit verder met kaneel opkikker. Moenie suiker byvoeg nie, ook nie heuning nie. Moenie die kitssoort gebruik nie. ROOSTERBROOD As jou baba vingerkos geniet, kan jy broodvingers maak van suurdeegbrood, rogbrood of volgraanbrood waaraan baba kan kou. Voeg ’n paar kaasballetjies by en dis ’n lekker ontbyt, of smeer ’n bietjie tuisgemaakte lewerpatee daarop vir ekstra yster. Jy sal verbaas wees hoe goed selfs ’n baba sonder veel tande al kan kou! Beproef gerus ook ’n botteltjie neutbotter om die roosterbrood mee op te vrolik.
JOGURT EN VRUGTE Natuurlike volroomjogurt met bessies of sagte vrugtestukkies soos papaja of piesang is bederfkos vir die hele gesin.
Middagete
’n Avo- saadbroodjie met ’n paar opgesnyde stukkies kersietamatie en komkommer is ’n heerlike middagete. Onthou net, jou baba se magie is maar klein – as ’n hele toebroodjie jou versadig is ’n kwart waarskynlik vir jou baba genoeg.
Koeskoes met klein stukkies sagte geroosterde groente soos botterskorsie, soetpatat en beet is ’n heerlike oorskietgereg. Sny net die vorige aand se groente kleiner en roer dit deur die gaar koeskoes. Dit werk ewe goed en gerieflik met bulgurkoring, bokwiet of quinoa.
Tuisgemaakte frikkadelletjies en gestoomde broccoli-boompies wat jou kind self kan vashou, is altyd ’n treffer.
Stukkies sagte hoender met ertjies en gaar aartappelkwarte is ook ’n maklike, voedsame middagete waaraan julle saam kan weglê. ’n Skeut suurlemoen oor die hoender sal jou baba se smaakkliere wakker maak.
Vlokke gestoomde vis met ’n spinasie-kaassousie is ’n beter keuse as visvingers.
Sit ryspasta met ’n tuisgemaakte tamatiesous voor. Voeg rooilensies by die tamatiesous en kook dit so sag dat dit byna verdwyn.
As jy lief is vir bak, kan jy met ’n tuisgemaakte mieliebrood middagete binne minder as 10 sekondes reghê. Sny eenvoudig ’n sny daarvan af en sit dit met ’n titsel botter voor. Ja, jou baba kan maar ’n bietjie botter eet.
Maak ’n growwe kapok van kekerertjies en gaar pampoen. Spoel geblikte kekerertjies net baie goed af. Dié eenvoudige gereg het ’n baie interessante tekstuur.
Aandete
Enige vleiserige bredie wat lekker sag gekook is, is gewilde babakos. Skep net die baba se porsie uit voor jy sout vir die grootmense byvoeg.
Pasta en maalvleis waarin jy sommer ’n hele paar groente kan versteek soos uie, wortel, seldery, sampioene, spinasie en murgpampoentjies, hoort in elke ma se kookarsenaal. En moenie die knoffel en kruie vergeet nie – dis goed vir jou baba!
Vispastei met ’n patat- en-aartappelbolaag en gestoomde blomkool daarby is bederfkos. Skep jou baba se porsie vroeg al uit, want daar gaan dalk nie oorbly nie.
Sny die sagste stukkie lamsvleis van die boud of skenkel af en sit dit vir jou baba saam met wortels en kaneel voor. Laat jou baba ook sommer toe om met die been van die boud te speel en daaraan te knaag. Dit hou hulle lekker besig aan tafel, al lyk dit ’n bietjie primitief. Bederf julle ’n slag met geposjeerde
salm. Dis heerlike babakos wat in die mond smelt en die beste bron van daardie allerbelangrike omegas.
Babas geniet die romerige tekstuur van sampioenrisotto en sampioene is propvol heilsaamheid. As jy dit met aftreksel gaarmaak, kies een met min natrium.