Wenke wat werk
KOMBINASIE-ROETINE
Dis dalk vir jou die sinvolste om ’n kombinasie-roetine uit te werk wat tussen die streng voorskrifte van ouergesentreerde skedules en die los riglyne van die babagesentreerde roetine val. Gebruik uit elke filosofie wat die beste by jou en jou baba se geaardheid en omstandighede pas.
3- 6 MAANDE
WAT JOU BABA NODIG HET
VOEDING Gee jou baba uitsluitend bors- of formulemelk tot minstens vier maande oud. Die Wêreldgesondheidsorganisasie beveel eintlik borsmelk tot ses maande oud aan, waarna jy geleidelik vaste kos kan bekendstel. Formulebabas sal tussen vier en vyf bottels per dag drink, terwyl borsbabas sewe of meer keer per dag kan voed. Verwag ’n groeiversnelling teen ongeveer vier maande en voed hom dan meer gereeld vir die volgende dag of twee. As hy honger bly, is hy moontlik gereed vir vaste kos.
SLAAP Jou baba moet 14 tot 18 uit 24 uur slaap. Teen hierdie tyd begin sy dae en nagte ’n vaster roetine aanneem. Die meeste babas behoort nou in staat te wees om agt tot 10 uur aanmekaar deur die nag te slaap. Hulle sal ook drie tot vier keer per dag slaap (altesaam tussen ses en agt uur).
SPEELTYD Jou baba behoort nou gemaklik ’n halfuur op ’n slag te kan speel voor hy weer moeg word. Onthou om sowat 10 minute magietyd in te sluit.
6-9 MAANDE
WAT JOU BABA NODIG HET
VOEDING Die opwindende wêreld van vaste kos gaan nou vir jou baba oop. Hy eet nou ontbyt, middagete en aandete wat bestaan uit vrugte, groente of proteïen. Sy melkvoedings verminder na vier tot vyf formulebottels of vyf tot ses borsmelkvoedings. Stel vingerkos bekend.
SLAAP Jou baba slaap 14 tot 16 uit 24 uur. Slaap word dikwels ’n probleem weens tandekry en skeidingsangs. Wees daar vir hom. Hy behoort 10 tot 12 uur snags te slaap en twee of drie keer bedags.
SPEELTYD Jou baba is nou gereed vir meer sensoriese insette. Gebruik sy wakker tye (omtrent twee uur tussen slapies) vir stimulasie en uitstappies.
9-12 MAANDE
WAT JOU BABA NODIG HET
VOEDING Jou baba eet nou vaste kos uit al die voedselgroepe. Moenie koeimelk voor jou baba se eerste verjaardag bekendstel nie. Moedig selfvoeding aan en voeg ’n verskeidenheid van vingerkosse by sy dieet.
SLAAP Jou baba slaap 14 tot 15 uit 24 uur. ’n Rustige slaapomgewing bly belangrik. Hy wil ál meer van sy wêreld leer en vind alles om hom interessant. Hy gaan sukkel om af te skakel en te gaan slaap. Hy behoort snags 10 tot 12 uur sonder ’n voeding te slaap. Hy sal een tot drie keer per dag slaap – 45 tot 120 minute op ’n slag.
SPEELTYD Jy gaan nou ál meer agter jou aktiewe, wakker baba begin aanhardloop. Wys hom sy wêreld, laat hy daaraan voel en proe en gesels met hom oor wat hy sien, hoor en doen. Betrek hom by ’n hele klomp stimulerende aktiwiteite.
Baie babas behoort nou die meeste aande deur te slaap, maar sommiges kan nog op een tot twee nagvoedings aandring.
Jou baba slaap nou sowat 11 uur per nag. ●