VOORBEHOEDING EN MELKPRODUKSIE

Ek borsvoed my baba van sewe maande en is van plan om so lank moontlik aan te hou. Ek wil egter nie nou weer swanger raak nie en het gehoor dat voorbehoedingpille melkproduksie kan onderdruk. Hoekom onderdruk dit melkproduksie? Wat kan ek gebruik?

LISANNE DU PLESSIS ANTWOORD: Verskeie gesinsbeplanningsmetodes is vir borsvoedende vroue beskikbaar. Party is natuurlik, party bevat geen hormone nie en ander bevat wel hormone. Dis ’n goeie plan om ’n professionele gesondheidswerker se mening oor al die beskikbare metodes in te win. Jou spesifieke gesondheidstoestand, omstandighede en behoeftes moet dan in ag geneem word sodat sy ’n ingeligte besluit kan neem.

Eksklusiewe borsvoeding vir die eerste ses maande van jou baba se lewe beskerm jou meestal teen ’n volgende swangerskap. Dit word die laktasie-amenoree-metode (LAM) genoem. Dit is 98 persent veilig indien die baba slegs borsmelk en geen ander vloeistof of vaste kos ontvang nie, as jou menstruasie nog nie teruggekeer het nie, as die baba jonger as ses maande is en as sy bedags minstens vieruurliks en snags minstens sesuurliks voed.

Volgehoue borsvoeding ná ses maande, wanneer baba vaste kos begin eet, kan ovulasie en menstruasie steeds onderdruk, maar is nie meer so doeltreffend soos met eksklusiewe borsvoeding in die eerste ses maande nie.

Volgehoue borsvoeding kan egter in kombinasie met van die ander gesinsbeplanningsmetodes gebruik word om ’n volgende swangerskap te voorkom.

Kondome, diafragmas en ander toestelle kan gebruik word as jy ’n metode verkies wat nie hormone insluit nie. Dit bied beskerming van sowat 90 persent teen swangerskap.

As jy hormoon-bevattende middels gebruik, beland daar klein hoeveelhede hormone in die borsmelk. Kundiges is dit egter eens dat progestien-bevattende pille versoenbaar is met borsvoeding. Studies het gevind dat die pil wat slegs progestien bevat, min of geen uitwerking op borsvoeding het nie. Daar word tans aanbeveel dat mense van ses tot agt weke ná geboorte met die progestien-bevattende pil kan wegspring. Mense wat nie tot dan wil wag nie, moet tot minstens drie dae ná die geboorte wag sodat die natuurlike verlaging van progesteroon kan plaasvind voor volwasse melk geproduseer word.

Langtermynstudies het gewys kinders van vroue wat progestien-bevattende pille tydens borsvoeding gedrink het, geen skade van die pil oorgehou het nie en hul groei en seksuele ontwikkeling tydens puberteit is nie beïnvloed nie.

Die pil wat estrogeen bevat word egter nie as die beste keuse vir borsvoedende vroue beskou nie omdat estrogeen melkproduksie en duurte van borsvoeding kan verlaag. Hoë estrogeenvlakke tydens swangerskap onderdruk borsmelkproduksie. Net ná geboorte daal die estrogeenvlak vinnig en word borsvoeding onderhou deur hormone wat prolaktien en oksitosien insluit. Dit word dus aanbeveel dat vroue wat die estrogeenbevattende pil wil gebruik, wag totdat die baba minstens ses maande oud is en vaste kos begin eet voor hulle daarmee begin. Die nuwer soorte kombinasiemiddels wat progesteroon en estrogeen bevat, bevat egter deesdae minder estrogeen as in die verlede en kan met veiligheid gebruik word vanaf ses tot agt weke ná geboorte.

Die metodes hierbo genoem kan gekombineer word met die LAM-metode vir beter beskerming teen ’n volgende swangerskap.