HOE WORD KNOPE BEHANDEL?
Daar is baie menings oor die behandeling van frenums, sê die Pretoriase tandarts dr. Zana de Wet.
As die vergroeisel so hewig is dat dit jou baba keer om normaal te funksioneer, moet dit so vroeg moontlik behandel word.
As dit net ’n tande- of tandvleisprobleem veroorsaak (lees onder meer hieroor), kan die behandeling wag tot al jou kind se permanente tande teen omtrent 12 jaar oud uitgekom het.
Een van die volgende behandelingstegnieke word gewoonlik ingespan, sê Zana: 1. ’N FRENOTOMIE ’n Snit word in die frenum gemaak sodat die tong of lip losser kan kom. Dis ’n blitsvinnige prosedure en help veral om borsvoeding makliker te maak. 2. ’N FRENEKTOMIE Die frenum word in sy geheel verwyder. Bogenoemde prosedures kan op verskillende maniere plaasvind: 1. KONVENSIONELE CHIRURGIESE METODE Die frenektomie geskied onder narkose en die wond word met steke geheg. 2. LASERTEGNOLOGIE Dis ’n vinnige en doeltreffende metode wat nie steke nodig het nie omdat daar nie bloeding is nie.
3. ELEKTRO-KOUTERISASIE ’n Metaalstafie wat met elektrisiteit verhit word, word ingespan om deur die frenum te sny. Bloeding is ook min maar daar is ander moontlike komplikasies wat dit minder geskik as laser maak. Pasgebore babas ondergaan gewoonlik ’n laser-frenotomie, sê Zana.
’n Spesifieke sagteweefsel-laser word gebruik om die frenum los te laat sodat die onmiddellike borsvoedingsprobleem behandel kan word. Dit kan sommer in die eerste paar dae ná geboorte plaasvind. Slegs oppervlakverdowing is nodig en dit kan in die dokter se spreekkamer gedoen word. Die baba kan onmiddellik ná die prosedure op die bors geplaas word om te voed.
Hierdie behandeling word deur opgeleide tandartse behartig of deur mond-en-kaak-chirurge.
“Frenums wat later gediagnoseer word, kan ook met laser behandel word. In sulke gevalle is ’n frenektomie gewoonlik aangewese,” sê Zana.
Vroeë behandeling vind net plaas as die frenum keer dat ’n baba normaal voed of as dit hom keer om normaal te praat. ●