BESORG OOR KIND WAT DUIMSUIG
My driejarige kind suig haar duim saans en ook as sy senuagtig is. Hoe kan ek haar help om daarsonder reg te kom?
LIZANNE DU PLESSIS ANTWOORD:
Babas het ’n natuurlike suigrefleks wat belangrik vir voeding en selfregulering is. Dis waarom babas en kleuters iets wil suig wanneer hulle gaan slaap of rustig wil word. Sowat 80 persent van babas en kleuters suig ’n fopspeen of vinger om hulle te reguleer. Een uit drie voorskoolse kinders suig duim, asook een uit vyf skoolgaande kinders.
Die meeste kleuters hou self tussen twee en vier jaar op om hul duim te suig behoort teen hul vyfde verjaardag genoeg ander selfreguleringsvaardighede te hê om hulle op ander maniere te kan vertroos. (Dit geld nie vir kinders wat angs, stres of trauma deurmaak of met sensoriese verwerking sukkel nie.)
Duimsuig is net in dié gevalle ’n probleem: • As jou kind se permanente tande uitkom, sal dit veroorsaak dat die gebit vorentoe skuif. Dit sal ortodontiese ingryping nodig maak; • As jou kind nie op enige ander manier selfregulering kan toepas en ’n drukkie van jou, kalmerende woorde of ’n rustige omgewing haar nie rustig help word nie; of • As dit bloot ’n gewoonte is en sy dit uit pure verveeldheid doen. Hou die volgende in gedagte wanneer dit tyd is dat jou kind die gewoonte begin afleer: • Gesels met haar daaroor en verduidelik waarom dit beter is om op te hou duimsuig, soos dat sy by die skool gespot kan word of dat haar tande kan skuif; • Sorg dat jou kind ’n spesiale kombers of sagte speelding byderhand het met slaaptyd of wanneer sy oorgestimuleer is. Dit word ’n verplasingsvoorwerp genoem omdat dit die duimsuiery vervang met ’n troosvoorwerp wat sy by haar kan hou. • Prys haar wanneer sy nie haar duim suig nie. Moet haar nooit straf wanneer sy wel haar duim suig nie. • Help haar om ander maniere te vind waarop sy senuagtigheid kan beheer. Berei haar goed voor op veranderinge, volg ’n konsekwente oggend- en aandroetine en maak tyd vir ongestruktureerde speeltyd saam sodat julle ’n sterk band bou waarbinne sy veilig sal voel.