MA WIL HÊ PA MOET MEER DOEN
Ek het twee kinders van drie en vyf jaar oud. Ek is ’n werkende ma wat my bes by die werk en by die huis probeer doen. Ek voel dat my man te min in die huis doen, wat my dan bitter maak. Ek wil hom ook nie die heeltyd vra om te help nie; ek wil hê dat hy uit sy eie deelneem aan take wat die kinders insluit. Hoe kan ek dit hanteer en aanmoedig?
LENMARIE STANTON ANTWOORD:
Ek glo die onus is op jou man om te verander – maar as die huidige stelsel hom bevoordeel, gaan hy beslis nie haastig wees om te verander nie! Dit sal hom én jou kinders egter help as hy ’n poging aanwend. In navorsing is bevind dat kinders wat huishoudelike take saam met hul pa verrig, minder tot depressie geneig is, meer gedissiplineerd by die skool is, meer taakgeoriënteerd is en meer maatjies het. Hier is ’n paar wenke om jou man meer betrokke te kry: 1Verduidelik op ’n liefdevolle manier aan hom dat al die verantwoordelikhede jou nie goed doen nie. 2Moenie ’n lysie aan hom oorhandig nie. Die meeste mans verwerp lysies wat hulle nie self opgestel het nie. 3Moenie speletjies speel nie. Sommige kundiges stel voor dat jy die huishoudelike verantwoordelikhede afskeep. Die idee is dat hy besef hoe waardevol jy is, maar dit kan die teenoorgestelde uitwerking hê. 4Moenie neul nie. Hoe meer jy neul, hoe minder kan dalk verander. ’n Magstryd kan dalk net meer konflik en frustrasie veroorsaak. 5Moet hom nie dwing om sekere take te verrig nie. Dit sal hom meer in beheer laat voel as jy hom ruimte gun. Die meeste mans verkies dit om self besluite te neem.
6Konsentreer
op wat hy wel doen en nie op wat hy nie doen nie. Verbeel jou hoe jy sal voel as jou man heeltyd jou foute uitwys en nooit jou goeie eienskappe raaksien nie. 7Maak
seker dat jou verwagtinge nie te hoog is nie en vermy dit om hom te kritiseer as hy dinge anders doen as wat jy dit sou gedoen het. Hy kan dalk net sê: “As ek dit nie so goed soos jy kan doen nie, doen dit eerder self”. 8Leer
hom. Jy kan ontdek dat jou man nooit geleer is om ’n mop te gebruik of ’n wasmasjien aan te skakel nie. En as hy weet hoe, kan hy dit steeds anders doen as jy. 9Vertel
hom hoe jy hom waardeer. Positiewe versterking help om herhaling van gewoontes te vestig. 10Oorweeg
huweliksberading. Terapie kan dikwels die oorsaak van die probleem behandel.