Amaqembu awamshiyanga uMengemali ngolokhuvethe
Kungakapheli ngisho amahora anagama-24 ebikele isizwe ngokuzokwenzeka emizamweni yokulwa nokhuvethe kanye naleyo yokuqinisekisa ukuthi umnotho wezwe uyageleza, UMengameli wezwe uRamaphosa uzithole ephansi kwengcindezi emva kokugxekwa ngamalungu ePhalamende ngesikhathi enza isethulo. Ilungu lePhalamende elimele iNational Freedom Party, uMhlonishwa u-Ahmed Munzoor Shaik Emam, ligxeke uHulumeni ngokuvula ukuthengiswa kotshwala, nokuvunyelwa kwamabhanoyi ukuthi asebenze futhi alayishe umthamo ogcwele.
Enye yezinto uHulumeni agxekwe kakhulu ngayo kulokhu kuhlala kwePhalamende ukuvulwa kwezikole. UMhlonishwa uJulius
Malema, onguMengameli weEconomic Freedom Fighters uthe:
“Yikuphi ukuyalwa okutholwe nguHulumeni ngokwezesayensi njengoba uMengameli ethula inkulumo yakhe efudemele kwakhe kodwa izingane kuthiwa azibuyele ezikoleni.” Amalungu e-EFF aphinde afuna ukuthi uMengameli noHulumeni baveze ukuthi yiziphi izinhlanga ezihaqwe kakhulu wukhuvethe. Ukugxekwa kukaHulumeni kuvele nakumholi we-United Democratic Movement, uGeneral uBantu Holomisa okhale ngokuthi eNingizimu Afrika kunokwahlukana kakhulu ngenqubomgomo yezomnotho yempahla enkulu. “Lokhu kubonakala nakuTripartite Alliance eholwa yi-African National Congress,” kusho uHolomisa.
UMholi weqembu eliphikisayo, uMnu uJohn Steenhuisen, ukhwele wadilika kuMengameli ngokulahleka kwemisebenzi nokuchaphazeleka kwezinkampani ezincane neziphakathi nendawo. Ukhumbuze uMengameli ukuthi iqembu leDemocractic Alliance lasho kudala ukuthi sekufanele kumiswe ukuvalwa kwezwe ngoba sekuwenzile umsebenzi wakho.
UMengameli ukuvumile ukuthi kuzothatha isikhathi eside ukuvusa umnotho wezwe njengoba kumanje kungaziwa ukuthi bangaki abantu abazolahlekelwa yimisebenzi. Ukugcizelele ukuthi uHulumeni usezongena agxile kwezamabhizinisi ukulekelela ukuvusa umnotho
Khona lapho uvumelene nelungu lePhalamende uMhlonishwa uMakhubeleMashele ukuthi ezemnotho emva kokhuvethe kuzofanele zibe nendima enkulu eqathwa uHulumeni. Lokhu kuzokwenziwa ngokuthi kubuyekezwe inqubomgomo, izindlela zokusebenza nesimo sezinhlaka zikahulumeni. URmaphosa ugcizelele ukuthi uHulumeni uzoqinisekisa ukuthi kuzoba nezinhlelo ezizokwandisa ukuqashwa kwabantu yimisebenzi kaHulumeni; ukutshalwa kwemali ekuvuselelweni nasekwakhiweni kwengalasizinda. Uphinde wathembisa ukuthi kuzoxhaswa kakhulu izinkampani ezincane nalabo bantu abahweba bengabhalisiwe.