Selitholakele ilahle emlotheni ngomthemelezo
Uyakholwa ukuthi akuphethe wubizo olungaba yimpendulo ngesikhathi sethu
Ngesikhathi kukhona ukukhala ngalokho ongoti abakubiza ngokuduka kanjalo nokulahla kwentsha imvelaphi yayo, intokazi yaseMandeni kwaZuluNatal isimi endaweni engejwayelekile nesiyaba yifusi ngoba kade ingasahleli futhi inganjwa muntu. Empeleni bese kungumlotha nje kungekho nethemba lokuthi kuyoke kutholakale okuyobuye kuvuse umlilo. Igama lale ntokazi nguNkosingiphile Mpanza owaziwa ngelika Zawadi YaMungu nokuyigama lesiShwahili elisho okufanayo okuthi INkosi Ingiphile.
Kuleli sonto ngaphansi kwenkampani iKhoza Klan, okaSandanezwe uzokwethula umnikelo wakhe, okuyicwecwe elisihloko sithi HRM Magogo School of Thought. Lo msebenzi ukhwezelwe, weluswa waphinde wasingathwa zintshebe, uMbuso Khoza kanye noNduduzo Makhathi nabahlonishwayo kulo mkhakha. Lesi sihloko salo mnikelo sisodwa nje sikhuluma indaba njengoba singegama loMntwana uMagogo kaDinuzulu.
Umbuzo wokuqala obhekiswe kuye wukuthi kungani eqhamuke nalesi sihloko nokuthi hlobo luni lomculo lolu akulo. Ngokuzethemba le ntokazi iphendulile yathi:
“Uhlobo lomculo engiwuculayo ngumthemelezo ongaphansi kwamahubo. Yize wabe uyingxenye yempilo yansuku zonke endulo kepha unqabe kakhulu futhi waqoshwa ngezikhathi zoMntwana uMagogo nowenza ubulungiswa ngesikhathi engagcini nje ngokuwucula kepha nangokufundisa abezizwe ngawo” kusho le ntokazi.
Ukwamukele ukuthi njengoba engawufundelanga nje umculo nalolu hlobo lomculo, okwakhe kwaba wubizo lokuthi azokwenza umnikelo ekuqhubeni lokho okwaqalwa ngabeza phambi kwakhe.
“Lo msebenzi uwukuhlonipha uMntwana uMagogo nowaba luphawu lokuhle ngathi. IsiZulu sithi inkonyama lihamba lapho kuhambe khona unina, nami ngihamba lapho kuhambe khona abazali bami bonke labo engibaziyo nengingabaziyo”, kusho le ntokazi ngezwi nangobuso obujulile.
Kuze kube yinamuhla uMntwana uMagogo uthathwa njengesazi hhayi kuphela samahubo kaZulu kepha nangeciko elabe ligogodile ekudlaleni ugubhu kanye nomakhweyana. Uma ecula wayenekhono lokusuka ekuculeni amaculo abe hlatshelelwa zintombi nxa zikhumbula izesheli namasoka. Engagcini lapho ngoba wayedlulela ngisho kulawo anomlando wesizwe okwakuyizigameko ezinye ayezibona okunye kube ngakufunda khona eNdlunkulu. Ulwazi lwakhe lwabe luyinoni kubahlaziyi kuleli naphesheya kwezilwandle. Ngonyaka we-1939 uDkt uHugh Tracey waqopha umculo wakhe nokwalandela ngeminyaka ye-1950 ukuqoshwa komsebenzi wakhe omningi.
UZawadi uthi okwehlukile ngaye namuhla nangesikhathi esaqala wukuthi manje ucula ngento anomlando ngayo nokuyinto atusa uKhoza ngayo. “UKhoza wangamukela ngaphansi kophahla lweAfrican Heritage Ensemble, nayilapho angilolonga khona izwi waphinde wangifunza ngomlando kaZulu namahubo. Lokhu kwenza ngawathanda amahubo futhi ngakuqonda ukujula nobumqoka bawo kithi njengesizwe”, kusho yena .
Kulolu hambo lwakhe ulifuze wangalishiya iqhawekazi lakhe uMntwana uMagogo njengoba naye usekwazi nokudlala ugubhu kanye nomtshingo.
Ebuzwa ukuthi ngabe lolu hlono lomculo lumqoka ngani ngezikhathi esikuzo uthe: “Siphila ezikhathini lapho kunesililo ngechilo lokubulawa kwabesifazane nezingane. Ngokudlwengulwa kwabo. Siphila ezikhathini zokhuvethe lapho imindeni elahlekelwe izithola isingasenalo ithuba lokulila ngendlela eyejwayelekile ngenxa yemithetho ekhona. Cabanga ukube konke lokhu kuxoxwa ngomthemelezo. Ngabe zimbili izinto ezenzekayo, okokuqala umlando walezi zigameko ngabe uyaqoshwa kusetshenziswa ubuciko bokucula. Okwesibili labo abaculayo bathole nethuba lokubhoboka,