Kukhuluma imali ebholeni
Inkulumo ethi imali ayiluthezi olumanzi cishe iya ngokubonakala manje. Sekubonakale kaningi omacaphuna kusale bethenga ubuthaphuthaphu izitifiketi zokudlala esigabeni esiphezulu sikanobhutshuzwayo.
Luqashwe yinyunyana yabadlali ngeso lokhozi udaba lwabadlali beBidvest Wits abangazithola bekweletwa imali njengoba isidayiselwe iTshakhuma Tsha Madzhivhandila.
Sekuvamisile ukuthi abadlali basale dengwane abaphathi abasha bengasayingeni eyokubakhokhela abakukweletwa abaqashi abadala.
Omunye umsindo udalwa wukuthi abakhokhelwa imali yokufudukela kwenye indawo.
Kwesinye isikhathi kufikiswana ezinkantolo sekucishe kwabanjwana ngezihluthu.
UMengameli weSA Football Players’ Union, uThulaganyo Gaoshubelwe (osesithombeni), uthe isimo seWits neTTM basiqaphe ngelokhozi. Uthe baqale ukubhalela iPremier Soccer League befuna ukucaciseleka nangamahlebezi okudayiswa kweReal Kings neBloemfontein Celtic.
Uthe abafuni ukuphindwa ngeseMpumalanga Black Aces neCape Town City lapho abadlali basala bekweletwa ngesikhathi la maqembu edayiselana. Uveze ukuthi inyunyana ibathintile abadlali ibaqinisa idolo.
Kwenzeka lokhu nje, maningi amaqembu asefana namabhubesi alambile njengoba ecathamela abadlali abaqavile nabanohlonze beWits. Abanye babo bazophelelwa yizinkontileka kanti abanye kuthiwa angeke iTTM ikwazi ukubaholela imiholo ekuthiwa imba eqolo.
Ukapteni weWits uThulani “Tyson” Hlatshwayo ungomunye wabadlali abafuniswa okomsebenzi. Lesi sitobha simataniswa neMamelodi Sundowns ne-Orlando Pirates kanti imeneja yakhe, uMike “Nanana Take Me Home”
Ntombela, ithe abafuni ukuxhamazela bathathe isinqumo.
UNtombela uthe ngokwakhe uHlatshwayo, okuthiwa inani lakhe lokubiza liyizigidi ezili-R19 ngokwe-www. transfermarkt.com, angakwazi ukungena khaxa kuwona womabili la maqembu ngenxa yesitayela asidlalayo.
UDeon Hotto okhwishizela ophondweni lwesokunxele naye umataniswa neSundowns nePirates.
Lo mdlali waseNamibia, obiza izigidi ezili-R18, ugabe ngokudlova nokuhlohla amagoli. Ufike kuleli wagijima kuLamontville
Golden Arrows wase edlulela kuBloemfontein
Celtic.
IkuWits lapho efike washintsha kakhulu kanti ubengesinye isethenjwa kuleli qembu eliqeqeshwa nguGavin Hunt. Umgadli uGift Motupa, osondela kuzigidi ezili-R14.2 ngokubiza, naye kubukeka engeke aliswele iqembu njengoba eke wafunwa iSundowns ngoMasingana. UPitso Mosimane waphumela obala ngokufuna umgadli ozomsiza kwazise anabo bebewakhohlwa emakhaya amakhokho. UMotupa, ogqame kuPirates eminyakeni emithathu edlule, ubeseshaye amagoli ali-11 ngaphambi kokumiswa kwemidlalo ngenxa yokhuvethe.
UThabang Monare onyakaza kamnandi esiswini ukhonjwa kuKaizer Chiefs, iSuperSport nayo iPirates. Lo mdlali waseMbalenhle eMpumalanga ubiza izigidi ezili-R13.8.
Omunye ongeke okubhekwe ukuthi anganceli izithupha uHaashim Domingo okhuliswe ku-Ajax Cape Town noke wathi qu kuVitória Guimarães encane yasePortugal. Lo mdlali waseswini ubiza izigidi eziyisi-R9.
Izitobha zeBafana Bafana uBuhle Mkhwanazi olinganiselwa ezigidini ezili-R17 noSifiso Hlanti yena obekwa ezigidini ezili-R19 ngokubiza, nabo kubukeka kuzoba lula ukuthi bathole amakhaya amasha. NoCole Alexander oyibamba esiswini nobiziswa izigidi ezili-R11.4 noZitha Macheke odlala emuva nolinganiselwa ezigidini ezili-R10.4 kungase maduze bahleke bodwa sebewutholile umsebenzi omusha.