Iqale ngokokugcina iBSA
Kumangaze abaningi abasemkhakheni wamankomane ukwenziwa komcimbi wokuklomelisa kwazitshwa ingqungquthela ebibhekwe ngabovu.
Ukuze isibhakela saseNingizimu Afrika sibuyise isithunzi futhi sihehe nabaxhasi, kumele iBoxing South Africa (BSA) iqoke inkampani ezimele ezoyihehela abatshalizimali.
Lona umbono kaThabani Khumalo, owake waba ilungu lebhodi elaqokwa uMnu uFikile Mbalula esenguNgqongqoshe Wezemidlalo eminyakeni edlule.
UKhumalo, owenza lo msebenzi maphakathi nowezi-2011 washiya ngonyaka olandelayo, uthi ngokwakhe kumele le nhlangano engamele isibhakela ezweni izijube iqashe inkampani ezobenzela umsebenzi wokuheha abaxhasi.
Wenze isibonelo ngePremier Soccer League (PSL) eqashe inkampani eyitholela abaxhasi nesidume cishe umhlaba wonke.
Ngaphansi kobuholi bukaDkt u-Irvin Khoza iPSL ishaya ngenqwaba yabaxhasi abanjengeTelkom, iMTN, iNedbank kanti basanda kulahlekelwa u-Absa.
UKhumalo uthe: “Uma iBSA ingakuzama lokhu engikuphakamisayo, hleze kungaba khona umehluko ngasekutheni abantu basibuke ngenye indlela isibhakela ngoba iqiniso lithi akekho obukeka ezihlupha ngaso njengamanje. Abaxhasi bahambela kude nesibhakela kuhle kwelanga lasebusika. Okumele kwenziwe iBSA ukuthi igxile ekutheni abantu abangaphansi kwayo okungosomankomane, ophromotha nabaqeqeshi bayayilandela yini imigudu efanele kodwa bayekele kubantu abangochwepheshe ukunxenxa abatshalizimali.”
Eqhuba uKhumalo uthe: “Ukhumbule ukuthi uHulumeni akakwazi kahle ukuheha abaxhasi futhi nawe uyazi ukuthi izinkampani ezizimele azithandi ukuzihlanganisa nezinto ezithinta uHulumeni ovamise ukumataniswa nezinto ezibheke eceleni.”
Inkakha uDingaan “Rose of Soweto” Thobela ithi ngokwayo isimo esibhekene nomdlalo wamankomane sifana ncamashi nesomuntu ovalelwe ekhoneni ongasakwazi ukuvika nokuziphindiselela.
“Ngezikhathi zethu abaxhasi babekhona futhi nezinga liphezulu kakhulu. Cishe wonke umuntu wayemazi uBaby Jake Matlala, emazi uVuyani Bungu emazi uRose of Soweto. Kodwa uma ungahamba ubuze abantu ukuthi ngubani umpetha kazwelonke, ungabathola benwaya amakhanda besacabanga ukuthi kambe ubani lowo. Ngikholwa ukuthi nezinkampani zifuna ukuzisondeza eduze kwento enedumela nebonakalayo ukuthi ibhekephi.”
UThobela uthi kumphatha kabi ukubona imiqhudelwano ye-Extreme Fighting Championships (EFC) yedlula eyeBSA ngokubangwa abaxhasi nokusakazwa njalo.
“Ngokwami umdlalo wesibhakela mnandi futhi uyaheha kodwa ngibona eye-Extreme Fighting iyabhora kodwa uma kukhulunywa ngabaxhasi bahamba bodwa. Kusukela ezinkampanini zeziphuzo, ezokubheja nezingubo eziphambili zokugqoka abe-Extreme Fighting bahamba bodwa. Ngezikhathi zethu isibhakela besincintisana nonobhutshuzwayo nebhola lombhoxo kodwa manje sesihluleka ngisho ukusondela eduze kwale Extreme Fighting,” usho kanje. Ngesikhathi iBSA igcina ukuba nabaxhasi kwakusekhona uMthombi Tyamzashe owafika noVodacom. Imali ayenzela iBSA yayibalelwa ezigidini ezingama-R40 ngowezi-2004.
Njalo ngonyaka iBSA ikhongeza izigidi ezili-R12 ovela
kuHulumeni.