Indlela yokupheka ebusika
Bungenile ubusika nabantu sebeshintsha ukudla abakudlayo nezindlela abakwenza ngakho. Thola kwelanamuhla ukuthi yiziphi izindlela ezintsha ezihambelana nalesi sikhathi sonyaka ongazisebenzisa ukupheka ukudla okuthandayo.
I-inthanethi kanye nezinkundla zokuxhumana kwenza kube lula ukubona ukuthi abantu benzani ngasiphi isikhathi. Ngaphandle kokungabaza, siyabona impela ukuthi ubusika sebungenile cishe ezweni lonke. Lokhu ukubona ngezimbawula esezothiwa cishe nsuku zonke, amajazi asevundululwe emabhokisini agqokwa kanjalo nezingubo esezelekwa emibhedeni uma kulalwa. Kodwa-ke, okungithokozisa kakhulu ngalesi sikhathi sonyaka ukubona indlela okushintsha ngayo ukudla okudliwayo. Sesibona kakhulu iningi labapheki selipheka ukudla okufudumeza umphefumulo nomzimba kulezi zinsuku. Abantu sebepheka kakhulu ukudla okufana nojeqe, amadombolo, isitambu, ubhontshisi, amathambo nokunye. Lokhu kudla bakuthokozela bezisonge ngezingubo zokulala phambi kwezimbawula. Sengiconsa amathe ngikubona ngamehlo engqondo nje konke lokhu kudla.
Kulula kwesinye isikhathi ukucabanga ukuthi kukhona uhlobo lokudla bonke abantu abakwaziyo ukulupheka. Umngani wami uke wangihlekisa kulezi zinsuku engixoxela ngokumangala kwakhe mhla ethola ukuthi kunelungu lomndeni wakhe elingakwazi ukupheka iphalishi elimhlophe.
Lokhu kungenze ngacabanga ukuthi mhlawumpe kuzofanele kesicobelelane ngezindlelakwenza zalokhu kudla esicabanga ukuthi wonke umuntu uyakwazi ukukwenza. Ngibe nengxoxo nabathize ezinsukwini ezimbalwa ezedlule ngendlelakwenza yamagwinya.
Ngamangala uma bonke becela ukuthi ngibabhalele phansi indlelakwenza yawo. Abanye bakhala ngokuthi amagwinya abo aqina abe ngamatshe, abanye bekhala ngokwehluleka ukukala izithako. Akusizi-ke nokho ukuthi ne-inthanethi igcwele izindlelakwenza eziyinqwaba nokwenza kube nzima ukwazi ukuthi iyona yiphi okumele ilandelwe. Namhlanje sizocobelelana ngayo le ndlela kanye naleyo yesinkwa esinsundu. Ngokuzayo, uma uzizwa uhalela amagwinya noma isinkwa kanti uyavilapha nokuphuma endlini ngenxa yamakhaza, usuyovele ushone ekhishini uzenzele wena.
Okuhle ngamagwinya ukuthi awadingi izithako eziningi kanti iningi lethu sivamise ukuhlala sinazo emakhaya lezi zithako. Ziyisithupha izithako ozidingayo. Uma ufuna amagwinya amaningi, ungaziphindaphinda kabili noma ngaphezulu izithako zakho.