Lubuyile ukhuvethe eChina
Sekuvalwe izimakethe ngenxa yokuqubuka kabusha kokhuvethe eChina osekwenyuse ukwesaba ukuthi leli gciwane lingaphinda libhubhise kuleliya lizwe elaba ngelokuqala emhlabeni ukuhlaselwa yilo.
Lawa ngamazwe anabantu abaningi emhlabeni. Womabili ane nuzi nokuyisikali sembubhiso. Futhi anamalungu ebutho iBRICS. Yize kunjalo kukhona okuwahlukanisayo - umngcele. La mazwe yiChina ne-India. Kuleli sonto emuva kweminyaka engama-45 kwaba nesivumelano ngomngcele kube nesigameko esishiye la mazwe engaphansi kwengcindezi. Okwenze isimo sashuba namehlo omhlaba athi njo kube wukuvela kombiko othi ekungqubuzaneni okube khona amagumgedlela aseChina athele othulini awase-India angama-20. Lesi yisibalo esiphindiwe kunalokho okuke kwabikwa ngabase-India nabaqale bathi kufe aba-3.
Lesi sigameko sibeka engcupheni isivumelwano esaziwa ngokuthi yiLine of Actual Control (LAC) esilawula indawo eseGalwan Valley. Kukhona ukukhuluma okuthi isimo sibi kakhulu kunalokhu uHulumeni wase-India akushoyo nokuthe kungaba nalokho isibalo sabe sesiba ngabangama-20. Kukho konke lokhu iChina ngomlomo wokhulumela uMnyango Wezangaphandle, uMnu uZhao Lijian, amagumgedlela ase-India eqe umngcele ephindelela kwaze kwaba yiziqubu ezimbili angagcina lapho kepha ahlasela osebenza ngasohlangothini lweChina kwase kusuka esinamathambo.
Ukuthimula kwala mazwe ngandlela thize kuyawuthinta umnotho womhlaba. Lokhu kucija kwemikhonto sekungase kubhebhethekiswe ukuthi vele awahoshelani. Ngokuhlaziya kongoti uNdunankulu uMondi (India) usondelene kakhulu nowase-United State of America ( USA) kanti i-USA isempini yomnotho neChina. Naye uMondi kamile kahle ngoba yize ephethe ngesibalo esikhulu sabavoti kepha iyanda ingcindezi yokuthi ubusa nje abenkolo yobusulumane ubapheke lubhojwana. Okwenza kube nokukhathazeka yikuthi sikhulu isibalo sabalimele ngasohlangothi lweIndia nokungasho ukuthi izakhamuzi zakuleliya zwe zingase zifake ingcindezi kuHulumeni ukuthi ubuyise izinduku. Ngokwephephandaba laseChina iGlobal Times, uHulumeni kaMondi ugeje umgodi. Lithi ubusuvele uziphathisa okwebhoklolo ngoba ubunenkolelo yokuthi iChina ixakekile njengoba iphunga i-USA nje ngeke ibe nomdlandla wokunaka izindaba ezithinta umngcele lo. Yikho phakathi kokunye i-India ibiqhubeka ithuthukisa ingqalasizinda ngasohlangothini lwayo lomngcele ifaka ubuxhakaxhaka abaseChina obekuyinto abangayinambithisisi. Kanti kuvele nokuthi isenzo sokuwela umngcele kweIndia asiqali ngoba senzeka ngowezi-2017.