IBrazil yamukela ikhambi leMalaria ukulwa nokhuvethe
Kuleli sonto abezempilo baseBrazil esithangamini nabezindaba babike ukuthi sekuzovumeleka ukuthi abesifazane abakhulelwe nezingane bazonikwa ikhambi lehydroxychloroquine elilwa neMalaria ukuze bakwazi ukugwema igciwane leCorona.
Abezempilo bakuleliya zwe baphinde bagxeka i-US Food and Drug Administration’s (FDA) emuva kwesinqumo sayo sokuvala ukusetshenziswa kwaleli khambi njengokuphuthumayo.
Lesi sithangami ebesisedolobheni laseBrasilia sibanjwe emuva kwamahora iFDA ibike ngesinqumo sayo esithe amakhambi ihydroxychloroquine nechloroquine awanakusebenza ekwelapheni igciwane leCorona yathi lokhu bakusho ngobufakazi obutholwe ososayensi kamuva nje.
Omunye wezempilo uMayra Pinheiro uthe: “Lokhu okushiwo iFDA akukwazi ukusetshenziswa njengesibonelo eBrazil noma umhlaba wonke, umsebenzi wethu ukusindisa impilo ngekhambi elikhombise imiphumela emihle ezimweni ezahlukahlukene eBrazil.”
Ihydroxychloroquine ibihlezi ituswa njalo nguMengameli waseUnited States of America(USA), uMnu uDonald Trump, owakubika ukuthi yena uyalisebenzisa ngendlela yokuzivikela kukhuvethe, kodwa konke lokhu ukwenza ososayenasi babenezicelo zokuthi akaqale avumele ucwaningo luveze ukuthi ngabe liyasebenza yini.
Ucwaningo emhlabeni lwaqala lwangabaza ukusebenza kwaleli khambi kwathi ekugcineni iFDA yanquma ukuthi la makhambi awahlangabezani “nenqubo ebekiwe” yokugunyazwa kokusetshenziswa kwaleli khambi njengokuphuthumayo. Kodwa uPinheiro uphinde wagxeka izifundo ezibekwe yiFDA lapho ethe “ikhwalithi yendlela yabo iyathusa kakhulu.
Ngaphandle kokwethula ubufakazi uPinheiro, uthe izibalo zabantu abanokhuvethe eBrazil ziyancipha kusukela mhla zingama-20 kuNhlaba ngesikhathi ezempilo zakuleliya lizwe zibeka imihlahlandlela emisha evumela ukusetshenziswa kwechloroquine nehydroxychloroquine kuzo zonke iziguli ezibonisa izimpawu zokhuvethe.