Uvalo eBeijing kuqubuka kabusha ukhuvethe
Sekuvalwe izimakethe kwanciphiswa nezindiza ezingenayo neziphumayo enhlokodolobha yaseChina iBeijing emva kokuqubuka kabusha kokhuvethe.
UMasipala wedolobha ubeke imigomo emisha eqinile wakhuphula nezinga lobungozi bokutheleleka ngalolu bhubhane emva kokuthi sekutholwe abanye abantu abangaphezulu kwekhulu asebethelelekile.
Sebelinganiselwa ku-137 abantu abatholwe nokhuvethe kusukela zili-11 kuya zili-16 kuNhlangulana.
“Isimo salolu bhubhane eBeijing sisasibi kanti idolobha selibike izinombolo ezigaphezulu kweshumi ngosuku zabantu abasulelekile kamumva,” kusho iPhini likaNobhala-Jikelele kuMasipala, uChen Bei, ekhuluma nabezindaba ngoLwesibili.
Abantu bayalelwe ukuthi bagweme ukuthatha uhambo olungenasidingo kwaphinde kwancishiswa nezindiza ezingena eBeijing ukuzama ukunqanda ukuthi ukhuvethe lungasabalali kakhulu.
Lokhu kwenzeka nje besekuphele izinyanga ezimbili iBeijing yagcina ukubika abantu abatheleleka ngokhuvethe. Imigomo eminingi ibisixegisiwe nabantu sebehamba ngokukhululeka, isimo sesibuyele kwesifuze esejwayelekile.
Nokho ngesonto eledlule kutholakale abantu abasanda kutheleleka abacela ekhulwini nokudale ukuthi kube nokwesabela ukuthi selubuya okwesibili ukhuvethe kuleli dolobha.
Isibalo sikhuphuke ngabangaphezulu kwama-30 kuleli sonto njengoba kuqiniswa imizamo yokuthola abathelelekile nokugwema ukusabalala kokhuvethe. Kutholakale ukuthi lolu bhubhane lusuka emakethe enkulukazi edayisa inyama nemifino i-Xinfadi, esifundeni iFengtai eningizimu ntshonalanga yeBeijing. Le makethe ihlinzeka izitolo kanye nezimakethe ezincane idolobha lonke.
Ngokwamaphephandaba ombuso, ukhuvethe lutholakale ezithebeni lapho bekuqotshelwa khona uhlobo lwenhlanzi isalmon nokuthiwa ivela emazweni ase-Europe. Nokho iPhini likaMqondisi Wezimo Eziphuthumayo eSikhungweni Sezifo Ezithelelanayo, uShi Guoqing, uthe abukho ubufakazi obuveza ukuthi isalmon iyona ebisingethe leli gciwane.
Yize litholakele igciwane kuyona inhlanzi eXinfadi, uShi uthi alukho ukhuvethe ezinhlanzini ezingakangeni kule makethe. Emva kokutholakala kokhuvethe, ibe seyivalwa kwathi izisebenzi nabadayisi abangaphakathi bavalelwa khona ukuze bahlolwe. Kuze kube yimanje sekuhlolwe iningi lezi makethe, izindawo zokudlela nabadayisi edolobheni.
Ezinye zezimakethe zisavaliwe kanti ezinxanxatheleni zezitolo sekuqiniswe ukuhlolwa kwabantu abangenayo beyothenga. Uma ungena emnyango kumele ubhalise nge-QR code nezobe isiveza imininingwane yakho okubalwa nokudalula ukuthi awuyanga yini endaweni enalolu bhubhane.
Yonke imiphakathi yaseBeijing isivaliwe kanti abangenayo kumele bahlolwe isimo sokushisa komzimba, baveze imvume yokungena, kuhlolwe isimo sempilo baphinde babhalise igama.
Amanye amadolobha aseChina nawo aseqinise ukuhlolela ukhuvethe okubalwa nezimakethe ukuzama ukunqanda ukubhebhetheka futhi kwalolu bhubhane. Ungoti kwezempilo kuleliya zwe uLu Jiehua uthe ukubhebhetheka kokhuvethe kwakamuva ngeke kwazikhathaza kakhulu izakhamuzi ngoba izikhulu zedolobha zikusukumele ngokhulu ukuphuthuma.
“UHulumeni unyusa izinga lobungozi balolu bhubhane ngokwemigwaqo nezifunda esikhundleni sedolobha lonke. Lokhu kungasiza ukwehlisa amaphaphu izakhamuzi,” usho kanje.
Uthe umkhuba wansuku zonke wokufaka izimfonyo, ukuhlanza izandla njalo kanye nokwehliswa kwesibalo sabantu abahlanganyela ndawonye sekuyinto ejwayelekile kubantu.