Indlala ibanga ulaka
Udaba lokuthuthukiswa kwentsha kwezomnotho akuyona nje inkinga ebhekene neNingizimu Afrika kuphela kodwa yinkinga yezwekazi lonkana. Ukugqoza kwentuthuko yentsha ngokwezomnotho kuhlonzwa amazinga okungasebenzi. Ucwaningo lwaveza ukuthi ukungasebenzi kwentsha eNingizimu Afrika kuphezulu kakhulu. Sekwenyuke kusuka kuma-54% ngekota yesine ngowezi-2018 kuya kwangama-55.2% ngekota yokuqala ngowezi-2019.
NgokweStatistics South Africa ngaleso sikhathi ukungasebenzi kudlange kakhulu kubantu abaneminyaka ephakathi kweli-15 nama-34. Kuba nzima kakhulu uma sekubhekwa ngokwezinhlanga ezahlukene.
Phezu kwalokho, umbiko wezi-2018 weWorld Economic Forum, obizwa ngeThe Future of Job and Skills in Africa, ubeka ngokuthi iSub Saharan Afrika yenza ama-6% ezibalweni zomhlaba, uma uqhathanisa nawomhlaba abalelwa kuma-24%. Kukhomba ukuthi njengoba kunokuphazamiseka kwemisebenzi namakhono okubangwa uGuquko Lwesine Lwezimboni (4IR) angama-9% amakhono anqala adingeka eNingizimu Afrika azobe esehluke kakhulu ngowezi-2020.
Kunengcindenzi enkulu kakhulu ohlelweni lwezwe lwezemfundo ukulungiselela abafundi ikusasa elingazeki kahle. Ukuqeqeshwa kabusha nokuthuthukiswa kwamakhono kuyadingeka ezingeni lezemfundo ephakeme kanye nasemfundweni yabadala. INingizimu Afrika inothe kakhulu ngemigomo yokuthuthukiswa kwentsha.
Osekusele nje okubalulekile uhlelo lokusuka emigomweni emihle ukuya ekuncishisweni kokugqoza kwentuthuko yentsha.
Konke lokhu kukhomba ukuthi izwe libhekene nomsebenzi omkhulu wokuthuthukiswa kwentsha.
Ekhuluma nentsha kuleli sonto uMengameli uRamaphosa utuse intsha ngokuba yingxenye yomzabalazo efana nalowo wabafundi wokulwela imfundo yamahhala i#FeesMustFall.
“Ukumpongoloza kwabasha ezinhlanganweni ezifana ne#FeesMustFall nokubhikishela ubudlobongela nonya lobulili kusize kakhulu ukuphuthumisa uguquko,” kusho uMengameli. Uthe selokhu kwathi nhlo abantu abasha bahlale belwela izinguquko. Nokho kukhona ukuvumelana ukuthi ulaka olubonakala entsheni yaboHlanga cishe kuyo yonke imikhakha yempilo ludalwa yizimo iningi layo eliphila ngaphansi kwayo. Lokhu kuhlaluka uma kunento le ntsha yaboHlanga eyifunayo okungaba kusezikhungweni zemfundo noma emphakathini. Imikhankaso eqala ngokuthula ingcina isinodlame kanti ababonakala bephambili kulo yiyo intsha. Akukhathalekile noma ifundile noma cha ngoba indlela eveza ngalo ulaka ibukeka ifana, inodlame.
Lokhu kwabanye kuvela njengento embi kepha ongoti bayavumelana ukuthi lokhu kudalwa umlando wezwe owabe unodlame nokungalingani. Ebhukwini elisihloko sithi: Between Anger and Hope – South African Youth and the Truth and Reconciliation Commision ( 2001), icishe isibeke isizathu esenza intsha yaboHlanga namuhla njengabazali bayo eminyakeni eyedlule kungabi nomehluko lapho ithi: “Abantu abayizinkulungwane eziyisikhombisa bafa ngesikhathi sodlame lwezepolitiki ngaphansi kobandlululo kanti ingxenye yalabo bantu babe ngaphansi kweminyaka engamashumi amabili nanhlanu ubudala. Abayizinkulungwane ezingamashumishumi abayintsha abazange bafe kodwa baba yizinkubela ezazilethwa izinhlaka zobandlululo ngezindlela eziningi abanye bagcine begogeke ngokomzimba abanye bethikamazeke engqondweni.”
Intsha yaboHlanga itholakala ezintweni eziyifaka otakwini kanti iphenduka izisulu zalabo abanezinhloso ezimbi. Emiphakathini eminingi kunokukhala ngokwanda kokusetshenziswa kwezidakamizwa yintsha yaboHlanga enye egcina isisemigwaqeni. Lokhu ngokusho kwabadala kwabe kungenzeki kepha kwande kakhulu ngesikhathi sedemokhrasi. Okuhlasele lubi kulezi zinsuku kanti netsha yaboHlanga kayisali wukubulawa kwabantu besifazane nodlame olubhekiswe kubo. Siyanda isibalo sabantu abasha besilisa abatholakala kuyibo ebenza leli chilo. Yize kuke kukhalwe ngezidakamizwa kulokhu kepha nesimo senhlalo nokukhula ngaphansi kwezimo ezithile kuyabalulwa njengesizathu sesihluku sentsha.
Zonke lezi ziwombe nezigameko zibukeka zinomsuka nomvuko wendulo. Phezu kwemizamo yakhe uHulumeni, intsha yaboHlanga iyaqhubeka ukuba yintabamlilo engadubula noma yinini, kanjalo nengozi yokuthi igovuzwe yipolitiki yamaqembu nokungacijisa imikhonto ezweni kwazise isisu esilambile kasazi mthetho.