Ithemba ngokuhlanzwa kwedamu laseNanda
Sekungenelele uMgeni Water odabeni lweNanda Dam engcoliswe izihlahla zokufika ezisuka eSouth America.
Ngesonto eledlule iBAYEDE ibike kabanzi ngokuthuthela kwalezi zihlahla kuleli damu eliseNanda nosekwenze abalimi abanezivande bahlalele ovalweni.
Abalimi bathembele emanzini aleli damu ukuphilisa izitshalo zabo. Ukungcola kusukumise intsha yendawo esigodini eSikebheni efingqe imikhono yangena phakathi emanzini engcole enjalo yalihlanza.
Ngenxa yokusabela ukuthi izitshalo nezilwane ezifana nezinhlanzi kuzofa ngenxa yokumomeka kwamanzi, le ntsha engaphansi kweKhaya Lemvelo Environmental Monitors Cooperative ibeke impilo yayo engcupheni ngokungena emanzini.
Okhulumela uMgeni Water, uNkk uShami Harichunder, uvumile ukuthi bayalwazi udaba lokungcola kwaleli damu wathi le inkinga sebeyilwe iminyaka.
Uthe uMgeni Water uke kwesinye isikhathi uzame ukuchela umuthi othile edamini ngenhloso yokubulala okungekuhle okungene phakathi.
Uthe ezinye zezimbangela zokukhula ngesivinini kwezimila emanzini ukuna ngamandla kwemvula. “Ngaphambi kokuthi singene esigabeni sesihlanu somvalelwakhaya kunabantu abayitoho ebesisebenzisana nabo belwa yona indaba yokukhuculula ukungcola edamini. Ngebhadi umsebenzi umile ngenxa yokuhlonipha umthetho kaHulumeni wokuthi angeke sikwazi ukuhamba kuzo zonke izindawo,” kusho uNkk uHarichunder.
Uqhube wathi uMgeni Water uvamisile ukuzibambela mathupha uma uhlanza idamu kanti kwesinye isikhathi usebenzisana nabanye abantu.
Uyale amalungu eKhaya Lemvelo ukuthi axhumane noMnyango Wokuthuthukiswa Komphakathi ukuze bathole uxhaso ngezinsiza nangokunye.
Umholi wayo, uMnu uThandwa Ngcobo, uveze ukuthi bakuthokozele ukusukumela phezulu kwaboMgeni Water lolu daba.
Uthe bethemba ukuthi emhlanganweni abazoba nawo maduze bazogoduka sebekutholile ukucebiseka ngendlela.
UNgcobo utshele leli phephandaba ukuthi isifiso sabo esikhulu ukufundiswa ukuthi bengenza kanjani ukuguqula lezi zihlahla zibe umanyolo bese zidayiselwa abalimi ukuze bondle izilwane nezitshalo kwabo.
“Kuyasikhathaza ukuthi idamu lethu likulesi simo. Sibona kuwumqondo ophusile ukuthi singasongi izandla ngoba sizobe singabenzi ubulungiswa kubantu abasakhela leli damu. Esikufisa kakhulu ukuthi sithole ukuqeqesheka ukuthi singayenza kanjani imali ngalezi zihlahla. Uma lesi sifiso sethu sifezeka kuyodaleka amathuba emisebenzi entsheni engasebenzi futhi silekelele ekufukuleni umnotho. Kodwa sidinga nezinto ezizosivikela uma sisebenza njengoba wasifica sijuluke simanzi sisebenzisa amahhala nobhushu sikhipha izihlahla,” kusho uNgcobo.
INanda Dam ithutha amanzi engakacwengwa aye kwaWiggins Water Works ngaphambi kokuyiswa eThekwini eseyodedelelwa umphakathi.
Leli damu elakhiwa ngowe-1989 liyisibungu kubavakashi abashiya betshale imali ezakhamuzini eziziphilisa ngokudayisa ukudla nezinto zokugqoka zesintu. Kulo kuvamise ukuheheka izindimbane zabantu ziyobuka umjaho wezikebhe omkhulukazi, iDusi Canoe Marathon, enqamula emfuleni uMsunduzi noMngeni.
IKhaya Lemvelo libunjwe nguye uNgcobo (33), uNobuhle Ngcobo (30), uBanothile Ngcobo (23), uLungile Khwela (27) noBusi Msomi (29) bonke abahlala eSikebheni.