UMnyango wamukela indlela entsha yokusebenza
Njengayo yonke iminyango kaHulumeni kulindeleke ukuba yenze izinguquko kulokho ebijwayele ukukwenza, uMnyango WezoBuciko Namasiko KwaZuluNatal oholwa uMhlonishwa uHlengiwe Mavimbela nawo ungomunye owenze izinguquko ukugwema ukuthi abantu bangahaqwa ukhuvethe. Lo Mnyango waziwa kakhulu ngemcimbi eyahlukene eminye okubuye kube ngeyesintu, izindawo zokugcina amagugu kanye nemitapo yolwazi.
Okhulumela lo Mnyango, uNks Phathisa Mfuyo, ulandise iBAYEDE ngezinhlelo abanazo ukulwisana nokubhebhetheka kokhuvethe kanjalo nokuqhubeka bahlinzeke umphakathi ngalokho okuklanywe wuMnyango.
UNks Mfuyo uthe selokhu uMengameli uCyril Ramaphosa amemezela ukuthi kuzoba nokuvalwa kwezwe lo Mnyango ubalwa ngaphansi kwale eminye yeMnyango ethikamezekile ukuvalwa kwezwe ikakhulukazi njengoba besebenza ngobuciko. “Ngesikhathi uMengameli ememezela lokhuimicimbi esase siyihlelile yamiswa ngaleso sikhathi. NjengoMnyango sibe sesiqhamuka namaqhingasu okuthi izakhamuzi zesifundazwe zingagcinwa kanjani zithokozile ngalesi sikhathi sokuvalwa kwezwe bese makhaya,” kusho yena.
Uthe yilapho ababe sebeqhamuka nemicimbi kusuka ngosuku lokugujwa kweNkululeko olungomhla zingama-27 kuMbasa, lapho benza umcimbi owawungathanyelwe abantu kepha abantu babekwazi ukuthi babe yingxenye yawo ngokusebenzisa izinkundla zokuxhumana beqhakambisa amaciko akulesi sifundazwe saKwaZulu- Natal. Lo mcimbi ulanywe ngomunye obumhla zingama-25 kuNhlaba wokugubha usuku i-Africa Day.
NgoLwesibili iNingizimu Afrika beyigubha usuku lwentsha, uNks uMfuyo uthe uMnyango bewugubha Usuku Lwentsha ngaphansi kwesiqubulo esithi “Youth Power: Growing South Africa Together in the Period of Covid-19”. Lesi siqubulo besisho ukuthi amandla asentsheni ukhulisa iNingizimu Afrika ndawonye ngesikhathi sokhuvethe. “Sibe nomcimbi sisebenzisa izinkundla zokuxhumana saphinde sasebenzisa ithelevishini kulabo abangekho ezinkundleni zokuxhumana, lapho sinxuse amaciko ukuba adlulise umlayezo kanjalo nokuziphatha kahle kuzakhamuzi ngalesi sikhathi sokhuvethe,” kusho yena.
Kulo mcimbi bekungekho abasafufusa kuphela kepha bekukhona nalabo abadume iNingizimu Afrika yonke abaqhamuka kulesi sifundazwe, phakathi kwabo nguDj Tira, nguDj Sox, nguDj Happy
Girl kanye noMampintsha. Kuphinde kwanikwa ithuba labo abangakaveleli kakhulu emphakathini. “Sixube amaciko ngenxa yokuthi besifuna ukuthi zonke izifunda zalapha KwaZuluNatal zimeleleke zibe nabantu babo,” kusho yena.
Uqhube wathi emzamweni wabo wokuqinisekisa ukuthi basebenzisa wonke noma zonke izinhlobo zamaciko babe bengasagcini ngabaculi kuphela kepha nosonkondlo noma izimbongi banikwe ithuba lokuba baqephuze. Lo mcimbi uthathe izinsuku ezimbili mhla zili-16 kuya zili-17, ulandela inkulumo kaNdunankulu wesifundazwe uMnu uSihle Zikalala.
Lo Mnyango njengoba kungasiwona wokudansa nje kanye nabaculi kuphela labo bona abacikoza ngezandla nabo kabasele ngaphandle ezinhlelweni zoMnyango. UNks uMfuyo uthe: “I-Arts Exhibition njengoMnyango sinezinhlobo ezahlukene zobuciko siphinda sibe nalabo abadayisa ngobuhlalu noma abathungayo imfashini kanye nalabo ababazayo, ingakho senza lolu hlelo lokuthi imsebenzi yabo iphinde ibonakale noma ifinyelele emphakathini belekelelwa uHulumeni ngoba bangabantu ababanethuba lokuthi bakhangise. Lokhu sasikwenza njengokukhangisa njengoba sasifaka nokuthi lawo maciko atholakalaphi ngoba siyazi ngeke bakwazi ukuphuma bayodayisa,” kusho uNks Mfuyo.