Kumnyama ezisebenzini zakwa-Edcon
UMengameli waseNingizimu Afrika, uMnu uCryil Ramaphosa, ujabulise abantu abaningi ngesikhathi ethula inkulumo yakhe ebimayelana nokuxegiswa kwemithetho yokhuvethe kwamanye amabhizinisi.
URamaphosa umemezele ukuthi kuzovulwa izindawo zokugembula, amacinema, izindawo ezokudla kanye nezokuzicwala izinwele.
Uthe uHulumeni uzomemezela maduze ukuthi lokhu kugexiswa kwemigomo kula mabhizinisi kuzoqala nini. URamaphosa ukugcizelele ukuthi lokhu akusho ukuthi imibandela ebekiwe uma kungenwa kulezi zindawo izoshintsha kodwa kuzoqhutshekwa nokuthi isibalo sabantu suqashwe.
Uma isixegisiwe le migomo amakhasimende azokwazi ukuhlala ezindaweni zokudlela adle okuyinto ebingavumelekile selokhu kwaqala umvalelwakhaya.
Isimemezelo sikaRamaphosa sisho ukuthi baningi abantu abazobuyela emsebenzini njengoba sekuphele izinyanga ezintathu abantu kade behlezi emakhaya. Lokho kwenzeka ngesikhathi kumenyezelwa ukuthi kuvalwa yonke into ehlanganisa abantu ngenxa yokudambisa ukuthelelana kwabantu ngokhuvethe.
Yize kunjalo kukhona abakhalayo, labo okuyizisebenzi zenkampani i-Edcon.
Kuvele ukuthi zibalelwa kuzinkulungwane ezingama-22 000 izisebenzi ezingase ziphelelwe umsebenzi ngokuvalwa kwale nkampani. Okuvelayo ukuthi le nkampani ithumele izincwadi ezisebenzini zayo izazisa ukuthi zingase ziphelelwe wumsebenzi maduze ngenxa yokwehluleka ukuthola abantu abangatshala imali noma abangathenga ingxenye yebhizinisi labo.
Le nkampani ephethe izitolo ezinkulu zezimpahla zokugqoka kuleli u-Edgars, iCNA noJet, imatasa izama ukuhlenga ibhizinisi ebelivele lithwele kanzima ngaphambi kokuvalwa kwezwe ngenxa yokhuvethe. NgoLwesithathu iveze ukuthi isiphoqelekile ukuqala ukuxoxisana nezisebenzi ngesimo esibhekene nezitolo zakwa-Edcon ngoba abazi ikusasa libaphatheleni.
Kuzisebenzi ezizophelelwa umsebenzi eziyizinkulungwane ezili-17 000 ziqashwe ngokuphelele, bese kuba eziyizinkulungwane ezinhlanu ezingena emsebenzini ngezinsuku ezithize.
Isitatimendeni esishishicilelwe ngomhla ziyisi-9 kwephezulu sithe, abakwa-Edcon Business Rescue P Practitioners (BRPs) bathi le nkampani ikhokhele izisebenzi amaholo kuMbasa nangoNhlaba kanti kulindeleke ukuthi iphinde ibakhokhele umholo kaNhlangulana.
“Kungaqinisekiswa ukuthi ukukhokhelwa kwamaholo kuzoqhubeka kube yinto eyenzakayo ngesikhathi sokutakulwa kwebhizinisi,” kusho isitatimende.
I-Edcon yinkampani eyasungulwa mhla ziyisi-6 kuMandulo ngowe-1929. Lokhu kusho ukuthi le nkampani ineminyaka engama-90 yabakhona.
Inamagatsha cishe amakhulu angama-203 kanti inezitolo eziyi-1 400 nangaphezulu enazo okubalwa ezilapha eNingizimu Afrika, eBotswana, eNamibia, eSwatini, eLesotho, eGhana, eZimbabwe naseZambia.
I-Edcon inezitolo zakwa-Edgars lapha eNingizimu Afrika, eBotswana, eNamibia, eSwaziland naseZambia. Uphinde ube noCNA eNingizimu Afrika, eBotswana naseNamibia.
Izitolo zakwaJet Mart nakwaJet Shoes zikhona lapha eNingizmu Afirka, eBotswana, eLesotho, eNamibia, eSwaziland naseZambia.
Uma kungagcina kwenzekile lokhu okukhulunywa ngakho kuyobe kusho ukuthi miningi imizi ikati elizolala eziko kuyona njengoba kuvela ukuthi izitolo ezingaphansi kwale nkampani ziqashe inqwaba yabantu.
Ngisho ngabe lezi zisebenzi ziyayithola imali ngaphansi kohlelo lukaHulumeni oluqhutshwa yi-Unempolyement Insurance Fund (UIF), kuzosinda kulabo abazophelelwa umsebenzi njengoba kunezinkomba zokuthi lolu khuvethe lusekude ukuphela.