Yinunu engafi iSAA, umafavuke
Inkampani iSouth African Airways isabalwa njengekhona ngoba nje kuyibhizinisi likaHulumeni. Ukuba yibhizinisi elizimele ngabe sekukudala lavala iminyango kwamila ukhula lapho kwakukhona izindlu. Sekuyiminyaka eminingi kukhulunywa kungaqedwa ngenkampani engayenzi inzuzo, kodwa kungathathwa zinyathelo eziqinile zokulungisa isimo. Kuze kube manje kunemibiko ehlukahlukene, kwesinye isikhathi ebonakala ikhetha amabala ngalokho obekwenzeka kwaSAA eminyakeni ethile eyedlule. Kunemibiko ekhuluma ngokudayiswa kwezindiza bese kwenziwa umbiko oveza sengathi inkampani yenze inzuzo. Kunemibiko engakaze inokondiswe yenanelwe ngabathile ababeyizikhulu eziphezulu kwaSAA okuye kuthiwe bahlomula ngokungafanele kusetshenziswa izimali zabakhokhi bentela.
Kuze kube namuhla iwa ivuka iSAA osekuze kwaqokwa abazosebenza benze uhlelo lokuyitakula ukuze izwe lingasali lingenayo inkampani yezindiza okungeyalo. Ngabe wukwehluleka kukaHulumeni noma ngokunye okungachazwa okwenza izinkampani zikaHulumeni kukhalwe ngazo nxazonke? Muva nje kuqale ukhuvethe lwathela amafutha emlilweni obewuvele uvutha. Kusobala ukuthi iSAA iyinunu engafi, umafavuke woqobo. Izisulu kungase kube yiningi lezisebenzi ezibhekene nokudilizwa ngokuqhubeka kwesikhathi.
Sekube yizinyanga eziningi kukhulunywa ngokudilizwa kwezisebenzi enkampanini iSAA. Ngokuqala kokhuvethe zishubile izinkulumo kwagcina sekukhulunywa indaba yokuyiqeda inkampani iSAA kubunjwe entsha.
UHulumeni ubesekubeke kwacaca ukuthi ayikho imali yokuthwala inkampani engayenzi inzuzo. Kugcine kusengathi sekuyemukeleka kodwa yaqhubeka impikiswano phakathi kwezinyunyana nalabo abaqashelwe ukutakula inkampani. Abatakuli benkampani iSAA abaNumzane uLes Matuson noSiviwe Dongwana kuleli sonto baqhamuke nomqulu onamakhasi ali-110 ochaza kabanzi ngalokho okuhlongozwayo ngenkampani eqalwa kabusha iSAA. Le SAA ehlelwe kabusha bahlongoza ukuba ihlangatshezwe uHulumeni ngemali elinganiselwa ezigidigidini ezili-R10,3 kuze kube wunyaka wezi2024, ngethemba lokuthi ngaleso sikhathi iyokube seyikwazi ukuzimela. Ngenyanga uZibandlela nyakenye kwavunyelwana ngokuthi abatakuli baqhamuke nohlelo olungase lusetshenziswe ukutakula iSAA ngaphambi komhlaka zili-15 kuNhlangulana wanonyaka. Nokho-ke bakwaze ukuwungenisa lo mqulu usuku emva kwelanga elalinqunyiwe.
Kuzokhumbuleka ukuthi sekuphele iminyaka engaphezulu kweshumi inkampani iSAA idla izigidigidi zabakhokhi bentela ingayenzi inzuzo. Kwabikwa ukuthi kusukela onyakeni wezi 2012 iSAA isebenze ngaphandle kokwenza inzuzo yalahlekelwa yimali eyizigidigidi ezingama-R27.
Seziphelele izindleko ezibalwe kulo mqulu wokuvusa iSAA zibalelwa ezigidigidini ezingama-R26,4. Le mali ihlanganisa naleyo eyizigidigidi ezili-R16,4 uHulumeni ayifaka kuSAA ngoNhlolanja. Ngokwalolu hlelo oluhlongozwa ngabatakuli, kumele iSAA iqale ukusebenza ngayo le nyanga kaNhlangulana, isebenze ngezindiza zayo eziyisithupha kuphela. Lezi zindiza kuzokuba ngezihambela eThekwini, eBhayi naseKapa, zisukela eGoli. Kuzosetshenzwa ngalezi zindiza eziyisithupha kuze be yinyanga kaNhlolanja wonyaka ozayo.
Ngokwalolu hlelo lwabatakuli, kuzodilizwa izisebenzi ezingamaphesenti angama-78. Uma kubalwa ngamaphesenti kwabanye kungabukeka kuyisibalo esincane kanti kukhulunywa ngezinkulungwane zezisebenzi. Kuzisebenzi eziyizi-4 622 inkampani entsha izogcina eziyi-1 000 kuphela kuthi izi-3 622 ziphelelwe wumsebenzi. Ngokwanda kwabagibeli ngokuhamba kwesikhathi zizoqashwa kabusha izisebenzi, nangesikhathi sekuvulwa eminye imigudu ezohanjwa yizindiza zeSAA. Kunethemba lokuthi lokhu kungenzeka kusukela ngoNdasa kuya kuZibandlela wezi-2021. Okunye kulindeleke ukuba kwenzeke lapho sekuvulwe izwe kwafikwa ezingeni lokuqala.
Lolu hlelo lunconzulula imali ukuthi izokhokhela ziphi izinto. Phakathi kwalokho okubaliwe, yimali yokususa umsebenzi phansi kabusha obalelwa ezigidigidini ezi-R2,8.
Imali ebalelwa ezigidigidini ezi-R2,2 izobhekana nezindleko zokukhokhela izisebenzi ezizodilizwa, ngokwezinhlelo okuzovunyelwana ngazo. Imali ebalelwa ezigidigidini ezi-R3 ihlelelwa ukubhekana nokukhokhela izindleko zamathikithi ayethengwe ngabagibeli bangakwazi ukuwasebenzisa. Sizokhumbula ukuthi izindiza zakwaSAA zamiswa isigubhukane, kuhlanganisa nangesikhathi kuqala umvalelwakhaya, abantu basala namathikithi sebewakhokhele kodwa engasenalusizo kubo. Zikhona nezinye izindleko ezibalwayo kulolu hlelo lwabatakuli.
Emqulwini onikezwe uHulumeni abatakuli bazolindela impendulo evumelana nalolu hlelo kuze kube mhla zili-15 kuNtulikazi. Uma ingatholakali impendulo evumayo kuyokuba nomhlangano mhla zili-17 futhi kuyobe kusho ukuthi ngeke luze luqale lolu hlelo oluhlongozwayo.
Akulula ukuqagela ukuthi uMnyango Wezinkampani ZikaHulumeni owenganyelwe nguNgqongqoshe uMnu uPravin Gordhan uzovumelana yini nalolu hlelo oluhlongozwayo. Ubeseke wezwakalisa ukungeneliseki ukuthi abatakuli sebethathe isikhathi eside bengaqhamuki nasixazululo esicacile sokutakula iSAA. UMnyango wethembise ukuzinika isikhathi ulubheke lolu hlelo bese ubuyisa impendulo.
Kubuhlungu ukucabanga ngalabo abazophelelwa wumsebenzi noma ngabe luyaphumelela lolu hlelo. Yisikhathi esinzima.