Osopolitiki nabezindaba abazithibe kulokhu
Ukuboshwa kwabasolwa akube yisiqalo sokujeziswa kwabagila imikhuba
Ngezizathu ezahlukene abantu baphawulile ngokwenziwe ngabeNPA lukeli sonto.
Lolu phiko oselunobuholi obusha, bugasele labopha labo abathintekayo echilweni elithinta iVBS Bank. Ngokophenyo olwenziwa ngu-Adv uTerry Motau kwakhwatshaniswa imali eyi-R 2,7 yezigidigidi. Lokhu kuhle futhi bese kuyisikhathi ngoba kudala sizwa kulinganiswa kepha kungekho okuphathekayo okwenziwayo. Umkhuleko wethu kulokhu munye nje vo, kuboshwa abantu nje ubufakazi bonke buphelele necala lizongena liphele maduze. Lokhu sikusho ngoba akuqali ukuthi lolu phiko lubikele izwe ukuthi selibambe okuthile okuwubufakazi dukuduku bese njalo kuyaphela ngodaba.
Yize sikwamukela ukuthi umuntu uba msula kuze kube icala lelo liyaphela, asingeke sikufihle ukuthi sifisa sengathi leli cala kungakhona elibalahlayo. Lokho ngokwethu sibona kungalekelela ekubuyiseni ukwethembeka kwezobulungiswa kuleli kanti kungasho lukhulu nakulabo abaqolwayo kakhulukazi abampofu.
Siyafisa futhi ukuba kulokhu osopolitiki nabezindaba ke bazithibe. Ngokwenza njalo bazonika abeNPA ithuba lokwenza umsebenzi wabo. Nalapha lokhu sikuphawula ngoba ezikhathini ezedlule abantu bebeboshwa futhi begwetshwa ezinkantolo zehlathi, emaphephandabeni nasemisakazweni begwetshwa ngabantu abangazona izinkantolo. Okosopolitiki-ke khona kuyaxaka ngoba basuke bafake udaka bese kuba yibo abamemeza kuqala uma iNPA ingasaphumeleli ngenxa yokuyibamba kwabo isavele ngekhanda. Ngabe senza iphutha uma singawuxwayi umlando weNPA wokusetshenziswa ngosopolitiki abasuke bevikela iziqu zabo.
Asinamizwa ngeNPA noma ubuholi bayo kepha njengezakhamuzi sinendaba nohlaka olunjenge NPA ngoba kulo kulele amathemba abaningi ngezobulungiswa. Nakulokhu siyazi ukuthi nabo bamagange ngoba bayazi ukuthi uma beke bahluleka ukushushisa ingcindezi izoba kubo.
Sizolwelusa icala leli ngoba kusobala ukuthi kukhulu okusazovela ebesingakwazi okwenzeka silele noma singanakile. Akulona leli ichilo eligilwa ngaboHlanga ngakho leli cala alibe yisiqalo sokujezisa abenzi bobubi kungakhathalekile ukuthi ngobani ababhekene nengalo yomthetho.