Empeleni izwe selivuliwe, siphila nokhuvethe
Umlayezo kaHulumeni usobala, uthi asizinakekele thina yena usekwenzile okwakhe
NgoLwesithathu kusihlwa njengokwejwayelekile abantu bebe magange belinde inkulumo kaMengameli uRamaphosa. Kulokhu uMengameli ubezophawula ngalokho okuthinta isigaba sesithathu nokuyinto afIke ahlala kuyo. Kukho konke akushilo okube sobala yikuthi izwe nomnotho sekuvuliwe. Ukuvulwa kwenzindawo zokudla, ukucwalwa kwezinwenele nezinye kusho khona ukuthi ingcindezi efakwa ngabamabhizinisi inkulu. Akuyena uRamaphosa kuphela obhekene nale ngcindezi kepha nakwamanye amazwe kunjalo, abaholi bancelisa amawele. Uma ulandela inkulumo kaMengameli kuyacaca ukuthi uHulumeni ukusiphi isimomqondo.
Okokuqala ufuna ukugwema ukuba kube nomdonsiswano ezinkantolo ngezindaba ezithinta ukuvalwa kwezwe. Kulokhu nje kwebhizinisi lokucwala izinwele kube sobala ukuthi isimemezelo sigweba icala elikhona eKapa lapho abeDemoctatic Alliance (DA) bebekhuleka ukuba inkantolo inqume ukuthi okwamenyezelwa uHulumeni ukuba akuvalwe leli bhizinisi akwenzi mqonmdo futhi akukho emthethweni. Isimemezelo sayizolo siqedile ngalolu daba.
Okwesibili uHulumeni ubukeka esegeza izandla esedlulisela konke kithi. Yithi emakhaya osekumele siqaphele futhi siqikelele inhlanzeko yethu. Yithi emabhizinisini okumele siqikelele ukuthi izisebenzi nalabo esihweba nabo baphephile. Konke lokhu kuhle futhi kuyezwakala. Indaba isekutheni ezinye zezinqumo zakhe zingahle zimumise kabi maduze nje. Ukwenyuka kwezibalo zabaxinwa yisifo mhlawumbe nabafayo kungahle kwenze uzwelo abantu abebenalo ngoHulumeni ngalesi sikhathi luphele. Ngeshwa uHulumeni ngeke enze lutho ngalokhu kuyomele agwinye itshe.
Amathuba okuthi izwe lehlele esigabeni sesibili ngisho esokuqala makhulu manje. Amathuba okuthi ugwayi uvumeleke kanjalo nemingcwabo nokunye ayanda. Kanjalo nalawo okuthi isifo sisabalale maningi. Kepha njengoba uHulumeni ezama ukusho konke sekusezandleni zethu.
Njengomphakathi uma sizicabangela thina nabasondelene nathi singenza umsebenzi kaHulumeni ube lula, singazinakekela ngoba ekugcineni kufa thina.