Intsha mayibe yingxenye yokuthathwa kwezinqumo
Nina bendlovu enamandla, ngiyakhuleka. KwelaboHlanga angethule nanku umbono ngekusasa lentsha yaseNingizimu Afrika.
Abantu abasha mabanikwe ithuba lokuba yingxenye yokudingida izinqumo nokuchitshiyelwa kwezimnqubomgomo. Intsha ikulungele ukuba ngababambisani abakhuthele ohlelweni lokukhuliswa komnontho nokwandisa amathuba emisebenzi kuleli.
Okubuhlungu ukuthi abantu abasha ababonakali ezinhlakeni eziphezulu zabaholi abathatha izinqumo ngekusasa leNingizimu Afrika. Okujabhisayo, ukuthi iningi labaholi abasezinhlakeni eziphezulu kuHulumeni abathatha izinqumo ngekusasa lezwe, bayobe bengekho kulelo kusasa.
Siyintsha ngaphansi kwenhlangano engenzinzuzo iYouth in Business South Africa, ubizo lwethu ukuqeda ubuphofu, ukulwa nokwentuleka kwengqalasizinda, ukunxenxa intsha ukuba iqale amabhizinisi yakhe amathuba emisebenzi ithuthukise umnotho wakuleli, ngenhloso yokuliswana nesibalo sentsha engasebenzi esimi kumaphesenti angama-64 kanye nokuqinisekisa ukuthi abantu abasha baphambili emnothweni nasemathubeni okuhweba futhi bakhe namabhizinisi azinzile, akhulayo anomuthelela omuhle ekukhuliseni umnotho wase Ningizimu Afrika.
Amabhizinisi amancane nasafufusa anomuthelela kumaphesenti angama-20 emikhiqizweni yasekhaya (GDP). Intsha ingaba yingxenye yesisombululo uma inganikwa ithuba. Nokuqhakambiswa kwemfundo nokuqeqeshwa kwamakhono kubalulekile ukuze kufukulwe, kulekelelwe umnotho wezwe, lezi ngezinye zezisombululo njenge nhlangano yabantu abasha.
“Intsha yanoma iliphi izwe iyikusasa yalelo zwe, izwe elingenakuqonda ukubaluleka kwentsha, alinakuqonda ukuba ikusasa liba phatheleni”. Lawa ngamazwi kaMnu u-O.R Tambo nanamhlanje asankenketha abe yisikhumbuzo ngokubaluleka kwabantu abasha.
Sidinga intsha kumaphesenti angama-40 efanelekile ezinhlakeni eziphezulu zikaHulumeni, intsha kuma40% efanelekile kumabhodi amabhizinisi aphethwe uHulumeni (SOE’s).
Siyintsha sinogqozi futhi siyazethemba. Siyakhuleka kubaholi ngezwi laboHlanga ezizweni zonke linye izwi, abantu abasha mabanikwe ithuba babe yingxenye kwezombusazwe. Siyintsha eyingcweti, efisa ukuba nomthelela ngekusasa nangenqubomgomo yakuleli.
Siyintsha enesifiso sokuthola ithuba sibhekane, siphenye ngokujulile izinga lenkohlakalo, silwisane nokwentuleka kwenqalasizinda kanye nomnotho ongasimami kahle, ukuze sikwazi ukuza nezinhlelo eziyisisombululo, eziletha, zithuthukise ezokuhwebelana namathuba angcono kwezo tshalomali.
Kodwa konke lokhu kuyinqinamba ngoba kasinakiwe futhi asiyona ingxenye yombusazwe wakuleli.
Ukuchitshiyelwa kwenqumbomgomo yobuholi obufanelekile ezinhlakeni eziphezulu zikaHulumeni kuyoba isiqalo lapho abantu abasha bethenjwa benikwa ithuba lokuba yingxenye yokuthathwa kwezinqumo ngekusasa leNingizimu Afrika.
Sisafuna ikhambi lokhuvethe, engathi besingelibala nekhambi lesifo sokuvalelwa ngaphandle kwabantu abasha ezinhlakeni eziphezulu ezithatha izinqumo ngekusasa lakuleli.
USifundo Senzelwe Mathe oweKhomishini Yengqalasizinda kuYouth in Business South Africa (YIBSA)