Intsha yamanje mayibe wushintsho efuna ukulubona
Kunemibuzo okuzomele sizibuze yona njengabantu abasha bebala elimnyama. Njengokuthi indlela esiyihambayo ingabe siyoba nokuziqhenya ngayo mhla sifika ekugcineni noma siyoba nokuzisola na? Ingabe ikhona yini imibono esiyimele njengentsha? Uma ikhona, iyona miphi?
Intsha yangowe-1976 yakwazi ngokubambisana ukushintsha umugudu womzabalazo ngokungunaphakade. Kwakuyintsha eyayinemibono ngesizwe sabantu abamnyama. Ingabe thina njengentsha yanamhlanje sinayo imibono ngezwe lethu?
Intsha yangowe-1976 yabhekana noHulumeni wamabhunu owawuhlome uzingovolo. Yona ibe ihlome ngonembheza, ubumbano nangombono wenkululeko yabantu abamnyama. Kwathi noma bedutshulawa, bebulawa, beboshwa baqhubeka baphokophela phambili.
Kuningi esingakufunda kule ntsha yangowe-1976. Okuhamba phambili nje ubumbano nokuzimisela ukubhekana nanoma yibuphi ubunzima uma ufuna ushintsho ngezwe lakho.
INingizimu Afrika kanye neAfrika yonkana ibhekene nobunzima ngokwezomnotho kanye nokwezepolitiki. Sinabaholi e-Afrika abaqhoqhobala izikhundla baze bayongena ethuneni. Sinabaholi bezepolitiki abangenayo intshisekelo ngokushintsha impilo yabantu
ENingizimu Afrika sisabhekene nomzabalazo owawubhekene nezizukulwane ezedlule. Umzabalazo wokukhululeka ngokupheleleyo. Inkululeko esayithola ngowe-1994 kwaba ngeyabathize. Akubanga ngeyabantu bonkana. Kuze kube yinamuhla umuntu omnyama usahlupheka. Sihlala ezindaweni ezingakulungele ukuhlala abantu abaphilayo. Ezinye izizwe okubalwa abelungu kanye namaNdiya ziphila impilo engcono. Abantu abasha baswele imali yokuqala amabhizinisi kodwa izingane zabelungu zinezindodla zemali ezayishiyelwa yimindeni yazo. Imindeni yabo yabe umnotho iwakhe ngegazi nangezithukuthuku zokhokho bethu. Kuze kucebe abelungu, amabhunu kanye namaNdiya kwabe kucindezelwe abantu abamnyama.
ENingizumu Afrika izinga lokuhlukunyezwa kwabantu besifazane liya ngokwenyukela. Ukusentshenziswa kwezidakamizwa nophuzo oludakayo entsheni kudlangile.
UHulumeni ophethe wathembisa ukulandela imigomo kaSomqulu Wamalungelo (Freedom Charter). Imigomo eqhukethwe yilo somqulu kubalwa imfundo yamahhala, ukubuyela komnotho ezandleni zezisebenzi, ukubuyisela umhlaba kwabawusebenzayo, njalonjalo.
Ngowezi-2015 abafundi emanyuvesi bahlanganyela kumbhikisho wemfundo yamahhala kanye nokususwa kwemifanekiso yobandlululo. Umbuso wabe usukuqinisekisa ukuthi bonke laba okade beyizishoshovu behamba phambili kulo mbhikisho bayaboshwa, baxoshwa nasezikoleni.
Ngowezi-2017 abafundi abangaphezu kwama-819 babehamba izinkantolo ngenxa yamacala aphathelene nemibhikisho.
Konke lokhu kukubeka ngokusobala ukuthi sibhekene nenkinga yobuholi kuleli zwe. Intsha kuzobaluleka ukuthi izame ngazo zonke izindlela zokuletha ushintsho kuleli zwe.
Ukuze intsha ikwazi uletha ushintsho kuzomele iqale ibambe izimfundiso zePan-Africanism kanye ne-African Nationalism. Lezi yizimfundiso eziyolekela ekulungiseleleni intsha ukuthi ikwazi ukubhekana nomzabalazo wezwe.
Intsha kuzobaluleka ukuthi ibe wushintsho efuna ukulubona. Ukuziphatha, indlela yokucabanga kanye nokwenza izinto. Kuyobaluleka ukuthi ibeke izimfundiso ze-African Nationalism phambili. Njengombono okuyiwo ozokwazi ukusiholela unkululekweni ngokupheleleyo.
Njengentsha yangowe-1976 eyanamhlanje inenselelo yokulwelwa inkululeko yezwe yabantu abamnyama. Isikhathi sokuthi aboHlanga bakhululeke ngokomnotho nangokwempilonhlalo sesifikile. Umzabalazo uyaqhubeka.