I-Abantu Batho Congress iphonsela uZikalala inselelo
Ngithatha leli thuba ukwethula iqembu lepolitiki enginguMengameli walo i-Abantu Batho Congress (ABC) kuSihlalo we-African National Congress (ANC) KwaZulu-Natal Mnu uSihle Zikalala nonguNdunankulu wakulesi sifundazwe.
Khuzeni kunezinto eziningi esibone kufanele ukuthi sizibeke phambi kwakho kungaze kushone ilanga. Siphinde sabona kumele siqale sikubhalele bese sazisa nawo wonke uZulu ukuthi yini esiyimele ukuze noma sikhuluma ungaze ubuze kwabanye kodwa ube nolwazi oluyiqiniso oluvela kithina njengabantu abeza nodaba.
Sizocela ukubuza imibuzo eqondene ngqo noBukhosi neNdlunkulu kaZulu neSILO njengomnini walesi sizwe.
Ndunankulu sesikuqaphelile kwaze kwaba kaningi ukuthi uma kuvulwa iSishayamthetho saKwaZulu-Natal kuba nesikhathi lapho oNgangezwelakhe ayaye asivulele eRoyal Show Ground eMgungundlovu kuthi uma sekunguwe kube sezindlini zeSishayamthetho khona eMgungundlovu.
Kungani oNgangezwe lakhe engavuli iSishayamthetho sangempela bese wena uqhubeke nomsebenzi kaHulumeni kuphelele lapho. Ukuvuliswa kweSILO iSishayamthetho ezinkundleni ibe indlu yokushaywa kwemithetho isazovulwa yisikhonzi saso sikubona kukhombisa ukweya nokwehlisa isithunzi iSILO. Siphakamisa ukuthi ngokuzayo lo mkhuba ungabe usenziwa ngoba wehlisa isithunzi seSILO noZulu wonkana. Khuzeni njengomuntu ongumZulu sicabanga ukuthi uzosiqonda isimo esikhuluma ngaso.
Kungaba yishwa ukuthi sihlale sisemaphutheni enziwa ngoba kwakudonsiswana ngamandla epolitiki phakathi kwe-Inkatha ne-ANC okwagcina kusifinyelelise lapho iSishayamthetho sesikhona eMgungundluvu hhayi Ondini njengoba kwakukade kufanele ukube uZulu wawubumbene. Amaphutha enzeka awakwazi ukuhlala angalungiswa.
Kuyiqiniso ukuthi isithunzi seSILO samaZulu, iNdlunkulu kaZulu nawo wonke uZulu ukudicilelwa phansi akuqalanga kwaphela ngamaNgisi namaBhunu esenzweni sabo sokulwa noBukhosi bukaZulu kodwa sikubona kuqhubeka sekwenziwa uHulumeni ebesicabanga ukuthi uzoba nezinjongo eziphusile ngesizwe nezwe ngoba usunganyelwe ngabamnyama kodwa sizibona sisaqhelelene nalokhu, izizathu zokuthi sisho lokhu ilezi ezilandelayo.
Isizwe samaZulu sineNgonyama yaso kodwa wena ubizwa ngoNdunankulu ezweni lamaZulu. Ngisho nezwe lonke laseNingizimu Afrika linezinye iziNgonyama kodwa kunendoda enguMengameli wezwe kanti ngokuqonda kwethu izwe elisuke lineNgonyama alibi noMengameli kodwa liba noNdunankulu, bheka nje eNgilandi, eLesotho, eSwazini nakwamanye amazwe. Okuxakayo-ke kubukeka sengathi uwena ophethe iSILO kunokuba kube yisona esiphethe wena neSishayamthetho saKwaZulu-Natal. Wena unguNdunankulu ezweni leSILO kodwa uwena obukeka unezwi kunaso. Sithola amalungu eSishayamthetho egxambukela kuze kufike lapho eba nezwi ekutheni iSILO kumele isabelomali saso neNdlunkulu kumiswe kanjani. Uma kwenziwa lokhu kuze kukhulunywe ngisho nangabantu abangewona amaZulu kodwa abaziyo ukuthi lapho bedabuka khona iNdlunkulu iyahlonishwa.
Ukuze kubelula ukuthi uqonde lapho sibheke khona ngizothi nje qaphu. Abelumbi baphuca aMakhosi umhlaba wawo kusukela ngowe-1652. Kusukela ngowe-1837 kuyaphambili umhlaba wamaZulu nawo waqhwagwa yizifiki zase-Europe. Ngowe-1852 wonke umhlaba wabantu owawungaphesheya kwenyakatho yeGwa nawo waqhwagwa.
Kwaphinda futhi ngowe-1854 kuyaphambili kwaqhwagwa umhlaba wabantu enyakatho yomfula yiSanqu kanti ngowe-1912 umtheshwana owawuzophasiswa zingama-30 kuNhlangulana we-1913 waqala walungiselwa okuyiwona owaphendla ukuxoshwa kwabantu ezindaweni ezabe sezingamapulazi abelumbi.
Ngesikhathi sokubusa kweSilo ILembe umhlaba kaZulu wawusuka phezu komfula uMzimvubu eningizumu uze uyofika kwaMabhuda enyakatho. Usuke olwandle eMpumalanga oze uyofika oKhahlamba entshonalanga. Zikhona nezinye izibonelo.
Kusuka aMakhosi aqala ukulwa elwela izwe lawo kwabe sekuliwa ngepolitiki yesimanje kodwa ebukeka iqhubeka ezinkambisweni zabelumbi. Kuyacaca ukuthi uHulumeni obusayo awuzimisele ngokubuyisela amandla okubusa eMakhosini esikhundleni salokhu kwalokhu okuncane okusasele kubantu uHulumeni ufuna ukukuthatha. Ubufakazi busendleleni amalungu ePhalamende alwisana ngayo noSihlalo we-Ingonyama Trust kodwa abanye abaphathwa ngale ndlela.
Kungakho Khuzeni unguNdunankulu ezweni lakwaZulu kodwa awubekwanga uZulu. Yingakho unenkinga ngesabelomali okumele siye kuso iSILO samaZulu ngoba impi yakho eyokuqeda umbuso woBukhosi obumpisholo njengoba kwakwenza abelumbi.
Sicela izimpendulo kulokhu:
Uma umcebo wasenyakatho esentshonalanga ukwazi ukucebisa isizwe saBafokeng kungani owasezimayini eziKwaZulu ungacebisi iSILO nesizwe saso?
Ngokwazi kwakho yini etholwa uZulu ngemayini ekwaMpukunyoni eMtubatuba ekubeni uMntwana uNtinini olamana neSilo uMpande wayegane uMayanda kaVayane khona esizweni sakaMkhwanazi? Le ndawo ingaphansi kweSILO.
KwaMbonambi kuneRBM ekhiqiza uhlobo oluphambili lwenzimbiwa phansi, iSILO noZulu bahlomula ini?
NgaseMthunzini kunemayini okungeyenkampani iTronox, le ndawo kwabe kungekaMntwana uMagwendu kaMpande ozalwa yinkosikazi uNoleyungu Mthethwa yaziwa ngokuthi kusoGagwini kwabe kuyisigodlo.
Khuzeni kungaba yisu elihle ukuthi uphumele obala uphikisane nokuba nesikhundla esingenzi lutho ekutheni kubuyiselwe kubantu okwabantu.
Kungaba ubuqhawe nobuhlakani ukukwamukela emizweni yakho ukuthi uBhejane Phuma Esiqiwini yiSILO sakho ngakho-ke wena neSishayamthetho sakho akukwazi ukuthi kube yinina enitshela iSILO ukuthi yikuphi okuthandwa yini ngoba esizweni samaZulu esibalelwa ezigidini ezevile eshumini akukho lapho savumelana khona ukuthi holani isizwe sikaZulu.
Sethembe wena ukuthi kube khona okwenzayo ngokudliwa komnotho ombiwa phansi ngabokuhamba ukuze iSILO nesizwe saso bahlomule.
Amachweba amabili kwelikaMthaniya asendaweni yeSILO kodwa aphethwe eGoli abantu baso bayizisebenzi zezinye izizwe.
Kuvume ukuthi uHulumeni wakho weba izwe leSILO ngevoti maqede wangasihlonipha ezweni laso.
Sidinga wena neSishayamthetho sakho ukuthi nithathe isinqumo esizoqinisekisa ukuthi leli lizwe eleSILO akusilo elenhlangano yepolitiki okanye izifikanamthwalo ezingazi ukuthi kuneNgonyama engumnini walo.
Ukuzihlonipha kwenu neSishayamthetho sakho sizokubona ngokuthi nihambe niye eHlalankosi niyoxolisa ngale mpazamo bese nazisa isizwe ukuthi nizokwenzani ukuthi ilungiseke.
Ngoba lokhu esikucelayo akuyona into enzima silinde ukuthi kwenzeke ngokuphazima kweso uma kungenzeki sizozithola siphoqeleka ukuthi siwahambe wonke amagumbi elikaMthaniya sazise isizwe ukuthi ukwebiwa kwezwe akusenziwa ngabelumbi kodwa sekwenziwa ngabantu abazibiza ngamaZulu.
Ukuthi esikhumulweni sezindiza esiqanjwe ngeLembe sekuphela ecela eshumini uHulumeni wakho uhluleka ukubeka umfanekiso weLembe, kukutshela ngokusobala ukuthi uHulumeni awuwakhathalele kangakanani amaZulu. Lokhu kufakazelwa imali esanda kusetshenziswa kuvuselelwa indlu yokuthandazela abangamaSulumane.
Umehluko phakathi kwesikhumulo sezindiza esiseGoli esiqanjwe ngoMnu u-OR Tambo kukhombisa ngokusobala ukuthi uhlonishwa ukwedlula iLembe.
Inkundla yezemidlalo iMoses Mabhida kuqalwa yayibizwa ngeKing Cetshwayo kodwa kwabuye kwaguqulwa ngosopolitiki ababona uMabhida ebalulekile kuneSilo.
Mingaki imigwaqo eqanjwe ngeZilo zamaZulu ikakhulu emadolobheni amakhulu KwaZulu-Natal ngaphandle koqanjwe ngeNdlovukazi uNandi
Imikhandlu emikhulu kwaZulu-Natal iqanjwe ngosopolitiki, angamagama angatheni emlandweni wethu noma angasho lutho ekulweleni izwe lethu kuze kuthi ezinye ezibalulekile ziqanjwe ngezigayigayi zakwamanye amazwe.
Uma kungasukunyelwa ngokushesha lokhu esikuqwashisa kukhona siyokuba buhlungu ngoba silindele ukuthi ukuvume ukuthi kade ungakaze ukunake ngakhoke uzokwenza ngawo wonke amandla ukusukumela isicelo neziphakamiso zethu ngaphandle kokuthi size singene emgwaqeni sibhikishele ukuthi lokhu kwenziwe.
Injongo yokusungulwa kwe-ABC ukuthi ingenelele yenze lokhu esasilindele ukuthi kwenziwe amaqembu epolitiki afana naleli oliphethe kodwa asephenduke aba ngabathengisi ngempilo nokuhlupheka okwahlushekelwa abaholi abasendulela.
UMnu uPG Mavundla unguMengameli we-Abantu Batho Congress (ABC)