Ubuchwepheshe besimanje bulekelela okweshashalazi
Ukuvalwa kwamatheatre kanye nezindawo okubanjelwa kuzo amakhonsathi ngenxa yokhuvethe kube imbibizane kubahleli nakubathandi bekaqesizungu emhlabeni jikelele.
Kodwa ukusabalala komqondo kwabanye kudale bajikela endleleni yesimanje kwasetshenziswa oWhatsApp, iZoom, u-Instagram noYouTube ukuhlela imicimbi.
Yize iNational Arts Festival (NAF) bekumenyezelwe ukuthi ihlehlisiwe kodwa isozoba khona kodwa kusizindalwebu salaba bahleli.
Le festiveli, enkulukazi e-Afrika nethanyelwa izindimbane ebanjelwa eMakhanda e-Eastern Cape, izokuba mhla zili-25 kule nyanga isongwe mhlazi nhlanu kuNtulikazi.
Lapha zisuke zibulalana nomculo, umdanso nezinkondlo. Abajwayele ukuyihambela bukhoma bazoyibuka kuzo lezi zinkundla zokuxhumana.
EState Theartre
IFreedom ikhuluma ngoPhindile (ogama langempela uZimkitha Kumbaca), oyisitshudeni saseTshwane Univeristy of Technology nongumholi we#Fees Must Fall. Impilo kaPhindile iyashintsha kunakuqala ngemuva kombhikisho wezitshudeni e-Union Buildings ePretoria.
Yize ebhekana nobunzima kodwa ukukhombisa intshisekelo nokuba namandla okulelwa akholelwa kukhona. Lo mdlalo wasesiteji ubuye udwebe isithombe ngodlame nobugebengu obudlangile emphakathini okuhambisana nokudlwengula kwabesifazane, ubandlululo, ukucwaswa kwabokufika nenkohlakalo.
IFreedom iqale ukukhonjiswa ngoSuku Lwentsha kanti izosongwa mhla zinhlanu ngenyanga ezayo. Ibukwa kuSouth African State Theatre You Tube Channel kusukela ngehora lesithathu nangelesihlanu ngokwahlukana.
IThe Fall, iqale ukukhonjiswa mhla zili-16 kule nyanga kanti izophela mhla zingama-30 kwephezulu. Ikhuluma ngezitshudeni eziyisikhombisa ezazifunda e-University of Cape Town Drama ezikhuluma ngezigameko ezazehlela ngesikhathi zemibhikisho ze#RhodesMustFall, i#FeesMust Fall neminye imibhikisho eyenzeka ngowezi 2015 nangowezi 2016.
I#RhodesMustFall yayihlose ukulwa nesichuse esibungaza uCecil Rhodes esibonwa iwo wonke umuntu uma ungena kule nyuvesi. Kulo mdlalo kuthintwa kakhulu udaba lobandlululo, ukuphilisana ngokwamazinga angafani, ubulili nobukoloni.
KuneSpeaking From Experience equkethe umculo nezinkondlo kuhlanganiswa kamnandi ngendlela efikisa imizwa yenjabulo nesibibithwane.
Kusuke kunebhendi edlala bukhoma ilekelelwa izwi lembongi echaza ngendlela eseliyihambile ngempilo. Iqale ngomhla zili-16 kanti izosongwa mhla zinhlanu ngenyanga ezayo. Izikhathi zokuqala ihora lesithupha nelesikhombisa kusihlwa ngezinsuku ezahlukene.
iLadysmith Black Mambazo
Labo abangajwayele ukubona lezi zingwazi njengoba zivamise ukunandisa phesheya, leli yithuba labo. Umqondisi wezobuciko kulesi sikhungo, u-Aubrey Sekhabi, uthe bazolokhu becaphuna emisebenzini yaMambazo ebebeyiqopha kulesi sikhungo esaphila umholi uJoseph “Mshengu” Shabalala.
Lezi zingwazi zizobhulelwa amazolo amaciko uPercy Maimela noNcamisa Nqana. UPercy yiciko elaqopha umlando emhlabeni jikelele futhi eliphethe iGuinness World Record ngokukhiqiza umsebenzi wobuciko ngokusebenzisa izinhlayiya zekhofi. Wakhiqizwa uhlelo lwaseState Theatre lokucija nokuqeqesha amaciko ukuze agcine efike ezingeni elikhokhelwayo ngowezi 2018. Usebuya ekuzungezeni umhlaba ekhangisa ngemisebenzi yakhe yezobuciko.
UNcamisa ngumzwilili nomqambi womculo we-jazz owavumbululwa yilesi sikhungo ngo2018. Wazakhela udumo ngomucwi owawuthi A Bird With Melodies.
U-Eddie Zondi
Abalandeli balo msakazi weMetro FM owashona ngowezi-2014 ngokumelwa inhliziyo bazokuba nedili lokumkhumbula. Le ndumezulu yomcimbi izobe isakazwa bukhoma kwiMetro FM ngoMgqibelo phakathi kuka10 ebusuku no2 ekuseni ngeSonto.
Kuzobe kuqhululwa izingoma zomculo opholile ongasoze wabuna owawuvamise ukudedelwa nguye uNondaba. Kuzobe kuboshelwe ithimba labasakazi abayingxenye yeLove Movement ayesakaza nabo, okungoWilson B Nkosi, uMsizi Shembe, uSentle Lehoko noMo G. Bazobe besina bededelana ihora lonke bakhumbula leli qhawe ngolozolo lomculo.
Abaphathi bohlelo kuzobe kungabasakazi balesi siteshi uThomas Msengana noLerato Kganyago. Ngaphandle kwabasakazi beMetro FM, kuzobuye kucule nezintandokazi zakuleli ayezifela ngazo uZondi, okubalwa kuzo iJaziel Brothers, Donald noMoneoa.
Ngisho nomculi waphesheya uRegina Belle uzonandisa ebukwa ku-online. UZondi wayengaphumi ohlelweni lwakhe iRomantic Repportiere engayidlalanga ingoma kaReginna. Leli dili ungakwazi ukubukela kuYouTube channel weMetro FM.