Wayesebenza buthule umfo kaBala kuTKZee
Wayengadumile kangako ngezikhathi zeTKZee ishisa izikhotha ngeminyaka yawo-1998.
Kwakugqame uTokollo “Magesh” Tshabalala noKabelo “Bouga Luv” Mabalane behamba phambili ekufoloseni ngamaphimbo abo ezingomeni ezifana nePhalafala neShibobo ezazinyakazisa cishe iNingizimu Afrika yonke.
Kodwa kwabamazi kahle bakusho kugcwale umlomo ukuthi nguye owayengungqongqondo ekuphembeni leli qembu le-kwaito laba ondabuzekwayo.
Lowo uMzwandile Bala (45), insizwa yaselokishini KwaNobuhle e-Eastern Cape efike emehlweni abantu waduma ngelikaZwai.
Njengoba ozakwabo bengasabonakali emehlweni njengoba begqitshwe ukwenza imisebenzi yangabodwana, uBala ubukeka edlondlobala kakhulu kunakuqala.
Nokho kuyacaca ukuthi uphekwe eDrakensberg Boys’ Choir School yodumo wabuye wahabula e-Associated Board of the Royal Schools of Music eLondon naseRoyal Scottish Academy of Music and Drama in Glasgow, eScotland.
Njengamanje umatasa uyaqhubeka ngezifundo zomculo kwaBerkleeMusic. com ngenhloso yokuthola iziqu kuFilm Orchestration.
Amakhono akhe asenze wapikwa kaningi njengomqondisi, umqambi, umbhali wengoma, umhleli nothishela womculo kanti useqokwe kaningi emncintiswaneni efana nama-SAMAs nama-Grammy.
Okunye okugqamayo ngaye ukuthi udumo aluzuze kuTKZee ulisebenzise ngendlela enokuhleleka. Imvamisa amanye amaciko angenwa udumo emakhanda bese ezithola esenaphazwa amaphephandaba agxile ezindabeni zangasese.
Imisebenzi alandwe kuyo ezosebenza njengejaji nangomqondisi kubalwa amaSouth African Film and TV Awards (SAFTAs), iM-Net’s “Face of Africa”, iGloCAF Awards iGospel Gold on SABC 1, iCoca-Cola Popstars ne-SABC 3 Christmas Concert eSandton Convention Centre neJohannesburg Philharmonic Orchestra; iDrakensberg Boys Choir; iJudith Sephuma and Tshepo Tshola. Njengamanje usebenza njengomunye wabethuli beRed Cake noCeleste Ntuli njalo ngeSonto ngelesikhombisa kusihlwa ku-SABC2.
Ngowezi-2004 waqondisa wabuye waba ukhondathi webhendi enabantu abali-8 kwiMJ Orchestra at the Old Mutual ‘Captains of Industry’ Dinner wabuye wenza umsebenzi ofanayo kuLiberty Life African Classics Evening with Sibongile Khumalo eCivic Theatre ePitoli.
Nguyena futhi owahlanganisa umsebenzi ka-Ali Campbell wodumo lwe-UB-40 neLadysmith Black Mambazo eGermany.